藝術嘅嘢一般星斗市民識咩吖？唔通你見到抽象派啲話你會覺得個人啲眼耳口鼻真係歪晒咩！呢啲咁主觀嘅嘢點睇就視乎你點解讀。最近有網民發現葵青區葵涌廣場對出，就出咗一個藝術品，有人話成個「山墳」咁，不過如果你知道呢件好似「山墳」嘅藝術品，係發展局舊年為咗慶祝回歸20周年，聯同幾個學會舉辦「城市藝裳公共藝術比賽」嘅其中一件藝術品，成件事會唔會合理晒先！

facebook專頁「荃灣葵青。左鄰右里」早兩日上載咗幾張相，葵涌廣場對出、葵芳興芳路同興寧路交界，出現咗一個叫做「安全島（Safe Island）」嘅藝術品，眼見呢件藝術品由一大堆紅磚砌咗個三角形出嚟，上面仲有幾個盤裁添，前面仲有個名牌，結果夾埋就成為孝子賢孫每年都見到嘅墓碑咁嘅樣嘞！

名牌果度嘅作品介紹，話就話「可以供人們坐下來聚會」，不過個「山墳」隔離又寫住「請勿攀爬」，媽！我好亂呀，唔攀爬上去又點坐呢？同埋喺路中心度坐，同部吸塵機有咩分別？


發展局回覆我哋話，呢個名為「安全島」嘅展品，係上年同香港建築師學會、香港園境師學會、香港規劃師學會同香港城市設計學會合辦「城市藝裳公共藝術比賽」，評審團根據設計團隊參與公共藝術經驗、藝術作品設計同概念、以及技術可行性等準則選出優勝作品。呢個優勝作品嘅安裝費用上限為85萬元。

發展局仲話，下個禮拜會派人視察，有咩睇呢？原來有報道話區議員投訴，話好似山墳令到街坊好不安，所以話發展局承諾區議員2個月內清拆。又裝又拆，唔知又嘥咗幾多罐午餐肉呢？

民主黨葵青區議員吳劍昇話，藝術品「安全島」擺放前冇諮詢過區議會，佢4月底發現該地點有工程，幾日之間已砌好，之後便不斷收到街坊投訴指「藝術品肉酸，似墳墓，尤其係上咗年紀街坊最不滿」。佢向發展局查詢，發展局話藝術品展期原本係一年，現時決定兩個月內移除。作品安裝費85萬元已包括移除費用。佢話近年唔少地區「地標」劣評如潮，當局應汲收教訓改善諮詢地區方式。

吳劍昇又話，「安全島」構成安全隱患，由興寧路轉出大路的車輛，尤其係車身較低的私家車，在駛近藝術品時會有一段短時間出現盲點，司機或看不到大路是否有車或行人。「安全島」所在位置係空地，冇阻礙行人，之前經常被電單車非法停泊，區議會較早前已同意喺該處進行綠化，預計明年開工。

【網民點睇】
Siu Yin Dora Shia：似山墳又似紀念碑，悼念死於交通意外的人士

Titus So：喺風水學上有種玩法叫「呼形喝象」，咁樣整個西式棺木＋花圈， 嗰區日後有排受。

Wolf Kin：為左趕絕電單車泊車可以去到幾盡

https://hk.news.appledaily.com/local/realtime/article/20180518/58206918