https://video.appledaily.com.hk/mcp/encode/2018/07/16/3654888/20180716_ccmxz22final2_mp4_w.mp4

宅男阿勇戀上美容妹成為情侶，於兩年內付出畢生積蓄50萬元，卻連手都不能拖一下。《蘋果》星期一上門找到Coco，她稱阿勇跟她只是顧客關係，但當被問到是否曾取用阿勇信用卡並花費20萬元時，她多番迴避說：「唔講住，你唔需要問我呢啲問題。」記者再向她展示她與「表弟」阿杰的拖手攬腰照片，她即表現緊張並發難說：「你哋唔好問，唔使問呢啲問題」，之後便大力關門。

記者：龔蕙芝 李啟發 劉卓瑩 攝影：周子惇

根據阿勇所講，他一年半前已向Coco表白，並獲她同意成為情侶，由他們的對話短訊也顯示Coco承認阿勇是男友，但當記者隔著鐵閘，詢問Coco跟阿勇關係時，她初時表現錯愕，之後稱：「我同佢係客人關係咋喎」，又指「以前我係有幫佢做facial嘅，佢係有追求我嘅。」似是想撇清情侶關係。

上星期才見過阿勇的她又說：「我要搵返佢睇下咩事先，我想知佢近況係點樣。」問到是否有使用阿勇信用卡時，她只承認：「（佢）有叫過我幫佢買嘢。」記者問信用卡是否在她手上並指有信用卡紀錄，她即迥避稱：「唔講住，你唔需要問我呢啲問題。」

當記者展示她與「表弟」阿杰的拖手攬腰照片時，Coco即十分緊張並重複稱：「你哋唔好問，唔使問呢啲問題，冇必要話俾你哋知。」之後更開始發難說：「你哋可以有本事嘅就喺樓下截我，你有啲咩法律權力係必定要我講先，我都唔係咩證人或者被告人，我都唔需要同你講。」之後便趕走記者。

她隨後即刻致電阿勇，根據她跟阿勇的對話錄音，她質問阿勇為何會有記者找上門，又稱：「講真我又唔係要貪你啲錢，你要拎返你咪去拎，你唔好同我講你要俾我用囉。」並指自己做事從來光明磊落，不會偷呃拐騙。
律師：借出信用卡雙方都犯法

阿勇稱若得知Coco有外遇會報警，大律師陸偉雄指，若事主將信用卡交給女友使用，二人都有機會被檢控，「如果（有人）係冒簽，我哋通常會告行騙，即係佢冒簽一刻，向商號聲稱係張卡持有人，但實際唔係，最高判監十年。」若女友與另一人一同使用該張信用卡，另一人也知女友非卡主，亦可能被控串謀詐騙。

陸大狀認為，要證明事件涉刑事罪行有一定難度，建議事主不應貿然報警，因根據他經驗，警方或會指事件是「你情我願」而「耍佢走」，認為事主應先尋求法律意見，例如有人用假感情去呃錢，過程中講過一連串大話，需由法律意見去判斷當中有否「關鍵情節的大話」令事主付款，從而構成某些罪行。

他指事主亦可循民事追討損失，「如果饋贈就麻煩啲，但你可以話我初初以為你係我女朋友，你亦都present（表現）到係我女朋友，我至俾錢妳……原來你呃我嘅，咁我俾你嗰樣嘢就唔成立，因為我俾妳有個條件，就係你係我女朋友。」

不過，律師梁永鏗認為，假如事主一直自願給女方錢，將不涉及刑事罪行；若事主想追討金錢，只可從民事途徑，但並不容易，因要搞清雙方有關金錢的協議，「呢啲感情嘅嘢，係咪等於呃呢？個女仔話，我都有鍾意呢邊，不過呢邊特別慷慨，係咁塞啲錢俾我，我咪用囉，都得㗎嘛，係咪先？」

你敢爆，我敢獎！即Call《蘋果》24小時爆相爆片熱線：63836568


《蘋果》記者上門找到Coco，向她展示她與「表弟」阿杰的拖手攬腰照片，她即表現緊張並發難說：「你哋唔好問，唔使問呢啲問題」。(圖右︰莊建鑫攝)


Coco不時到「表弟」阿杰屯門家中短聚。(莊建鑫攝)


阿勇曾將信用於限額減至1萬元，當Coco得知後，要求他改回原來的1.5萬，否則「老死不相往來」。


大律師陸偉雄指，若事主將信用卡交給女友使用，二人都有機會被檢控詐騙或串謀詐騙。


Coco在家中回應事件，被問到跟阿勇關係時，稱他是其客戶，似想撇清關係。

source : https://hk.news.appledaily.com/breaking/realtime/article/20180717/58450070
+++++++++++++++++++++++++++++++++++++++++++++++++++++++++++++++++
好慘 ，美夢破碎