「西片講廣東話值得高興嗎？」

好多人睇咗近日上映嘅西片《高凶浩劫》都話有親切感，皆因故事發生喺香港，全片又不斷出粵語對白，值得大家支持云云。

明嘅。當阿爺一日到黑貶低香港人，甚至妄想用「大灣區」三個字消滅「香港」呢個地理概念，難怪咁多人喺絕望中四周圍搵身份認同。之但係《高》片入面呈現嘅未來香港，真係值得我哋當寶嗎……?

作為男主角The Rock（Dwayne Johnson）粉絲，兼且係《Die Hard》呢部戲嘅die hard擁躉（《高》片明顯係21世紀版《虎膽龍威》），自問都想入場享受一部唔使用腦嘅爆穀戲。問題係我一心匿入戲院逃避政治，偏偏政治係都要鬼鬼祟祟追入嚟。既然激到嬲嬲哋，我就花啲時間同大家驗一驗佢。

「你信唔信香港人會用百度上網？」
《高》片講述前FBI探員Will Sawyer喺一次任務不幸無咗隻腳，惟有轉行做保安顧問；咁啱香港富商剛起好一幢高智能商住兩用摩天大廈，於是聘請Sawyer擔任保安評估，仲包埋豪宅住宿同一切N星級設施，表面上簡直係絕世筍工。點知呢座四層帝國大廈咁高嘅建築發生大火，而且背後隱藏不可告人嘅勾當，Sawyer為救老婆仔女，只好撐住高科技義肢，上演一幕幕Hong Kong Die Hard……。

你話古仔好正路，無乜唔妥？睇咗戲嘅朋友，懇請你再回一回帶諗真啲。

先講大廈本身。幢嘢取名「明珠塔」，加上塔頂真係有粒娘到核爆嘅圓珠，好自然令人諗起土豪味滿分嘅上海「東方明珠塔」。

OK，就當改名呢啲嘢只係咁啱得咁橋。咁我哋講吓大家最受落嘅廣東話：片入面絕大部份華裔老臨講嘅，真係大家聽慣聽熟嘅廣東話嗎？作為speak咗四十幾年Cantonese嘅麻甩佬，片入面啲粵話對白簡直聽到我耳膜都生尷尬癌。嗰個香港警官阿文峰，啲「香港話」算係全套戲最標準喇，但係佢懶dramatic鏈出嚟嗰句「X街」，直頭好似平生第一次講粗口一樣，timing、語氣全部錯晒。據聞製作團隊專登請咗粵語導師教演員背稿，我就好好奇，佢哋使唔使好似浸大學生咁，考試pass先埋得位呢？今時今日，當政府高官夠膽死話廣東話唔係我哋母語，我覺得《高》片直情預視咗未來嘅香港──一個下一代廣東話水平差過英文嘅香港。

又係我諗多咗？Fine。咁跟住呢樣睇怕你無得駁嘞：21世紀差人查案，當然會用到電腦啦；咁《高》片入面香港警方上網查案，又用乜呢？答案係「百度」。「百度」呀！一個任何殘酷真相都查唔到嘅搜尋引擎呀！部戲係咪想話我知，不久將來香港會禁用Google同Chrome？連Yahoo呢啲史前遺物都無人敢掂？定還是回歸後愚民政策終於見效，新一代差佬智商跌到中央滿意水平？

坦白講，觀眾都唔係傻嘅。我睇嗰場，去到警方用愛國engine上網呢個位，現場即時傳嚟「環迴立體嘘聲」。大家可以接受主角The Rock挑戰物理定律，用牛皮膠布爬上3500呎摩天大廈，但係你話香港差人用百度上網......咁同話香港觀眾最鍾意睇亞視有乜分別？既然係咁，部戲講一堆山寨廣東話，又真係值得高興嗎？

「梁雁翎現象」
翻查《高》片美國本土票房，一如所料，仆咗：開畫日只收二千五百萬美金，但部戲未計宣傳，淨係製作費都已經一億二千五百萬。呢啲戲似乎根本唔係拍畀美國人睇。再睇睇邊間電影公司咁濕滯，先發覺原來係Legendary Pictures——亦即係畀大陸萬華集團收購咗嘅「傳奇影業」。

講到呢到，想同大家分享一個觀察，我稱之為「梁雁翎現象」。話說90年代，卡拉OK剛剛開始盛行，有唱片公司為力谷旗下歌手，曾經掃光電視台夜間廣告時段，狂loop同一首主打K歌。當時loop到人都癲嘅，係一位叫梁雁翎嘅台柱。問心，梁女士唱功其實唔差，可惜無論有關方面點樣包裝，始終難掩佢濃烈嘅祖國氣息，同四大天王年代嘅本地樂壇格格不入。當年大部份後生仔女如我，根本無當過佢係香港歌手，更加無可能買碟返屋企欣賞（反正唔買電視台晚晚都迫你聽）。

奇就奇在梁女士當年據聞都搵到吓錢。有說佢其實頻頻返大陸開show，喺嗰個資訊唔流通、內地娛樂事業又未起步嘅年代，只要打住「香港紅星」嘅牌頭，大把同胞爭住撲飛捧場。表面用先進地區包裝，實質針對落後地區口味，將二三線文化產品出口外銷，呢個就係我所講嘅「梁雁翎現象」。

令我心寒嘅係，當紅色資本染指荷里活，拍出《高凶浩劫》咁嘅正嘢，而大家居然又睇得津津有味……到底香港人口味係咪開始被同化，接受廿一世紀嘅「逆向梁雁玲」？

撰文：阿雞
《蘋果動新聞》前創作總監，文化雜食者，high嘢cheap嘢都啱，淨係冇中間。現為網台Booom主持cult片節目《百老匯電椅中心》，並負責附屬FB群組《百老匯電椅中心:放棄治療部》（broadwayelectricchair）

source : https://hk.lifestyle.appledaily.com/lifestyle/culture/daily/article/20180721/20455883
+++++++++++++++++++++++++++++++++++++++++++++++++++++++++++++++++
完全唔想睇