https://video.appledaily.com.hk/mcp/encode/2018/07/26/3662023/20180727_sub317newnewAD_mp4_clean_w.mp4


一鋒說，男主角其實就是他自己：「有型，有正義感。」

動漫節埋身了，朋友傳來新出《大災難師》海報，背景係打到溶溶爛爛的深水埗街景，仔細到成張荷里活電影CG海報咁，好靚喎！但喺呢個年代仲出漫畫實體書？除了係畫壇名人或老手，怕唔怕丟錢落海？望吓個Profilo，一個26歲眼大齊蔭的漫畫家。佢指住一個置身暴風中的港漫式型尖面男主角，男主角有個少少Layer的齊陰頭，佢笑笑口講：「呢個，其實係我嚟。」

林沛鋒，筆名一鋒，從小就想做漫畫家，部份同學知道會問：「乜香港有漫畫家咩？」2017年，他跟兩位漫畫界老師與前輩鄺世傑及李重豪作漫畫企畫，贏了「青年動漫電玩創業大賽」優異獎，得到四十萬港元獎金，獎金鼓勵得獎者開創企業做生意，他選擇開公司出書畫《大災難師》。漫畫將於7月27日於動漫節推出，故事主角們各懷不同災難技能，要做好事定壞事，就看主角性情際遇造化了。漫畫計劃像美劇般一輯輯推出，用世界各地的災難帶大家遊世界。第一輯預計有六至八集，背景是香港。裏面有啲魔幻，有啲愛情又有啲打鬥，最緊要係熱血：「你會見到一些好想打破的東西粉碎了，如深水埗唐樓倒塌、地鐵水浸等等，有災難就有好多生死，同民生的問題。」


為讓漫畫背景更真實，他用美漫流行的Map Painting技巧，資料搜集時到處拍香港城市街景作參考。


講災難，航拍不同角度的建築物更少不得。


動漫節上，他還會推出《大災難師》的精品，二十片透明膠片，砌出立體旋風圖。

同好多漫畫家一樣，他的生活幾乎是一起床就漫漫畫。食飯、畫畫，有時睡一陣子，睡醒又畫。同女朋友FaceTime，一個星期食兩次飯，對上一次行街拍拖買嘢，已經係年頭。與其老土講係堅持同熱血，不如講佢係沉迷：「有時諗到驚天地好橋好興奮，想畫畫時女朋友打來話想食飯，我根本唔想行開，我想畫呀！」

業內人都覺得香港畫漫畫前景堪虞，近年大熱的都是短篇、四格、插畫式的生活或時事漫畫。鄺世傑看着港漫由九十年代初高峰，每星期啲人企喺書報攤等三、四十本港漫，到現在只剩下五、六本周刊漫畫，「係差得遠，但唔等如無得做，不過你要做得好好好好。」近年都好少見到一本書，由這麼有熱誠的年青人做，「太有經驗的港漫人看到演變，會失去朝氣，一鋒本身都有啲精神病，麻木地覺得ok，但好多時成功就係需要一些人麻木地覺得ok，可能才能突破困局，令他成功。」繞個圈，就係夠熱血，夠勇同唔識死。教了多年漫畫，他遇到太多心灰就離去的年青人，但一鋒不同：「他每日都會衝入我房，『喂！阿sir呢條橋好掂呀！』我有時會Ban佢，覺得唔合邏輯，有時啲公仔關節都唔合邏輯，佢死死氣走返出去，隔五分十分鐘又衝入來諗過！佢未必好有天份，但係個好好的麻煩解決者。要不停接受挫敗，又不停覺得自己好掂，諗辦法解決難題，才能做漫畫。」


每個災難師都可控制一種特殊災難，至於用得好與壞，就看災難師的修為了。


為趕稿，他這半年來大部份時間都躲在Office房。


鄺世傑是一鋒的漫畫老師，也是這本漫畫的監制，也幫忙畫圖。他覺得，一峰最強是不怕挫折，不停解決問題。


Map Painting需要較高的電腦技巧，不過畫出來的背景，更細緻真實及能表達速度感。

熱血追夢，現實還是避不開計算。過去漫畫界分工精細，人物、背景、效果線，起碼六、七個人畫一本，主筆、景手累積的經驗與人工，都係成本。這部漫畫全電腦製作，好多事都可一人包辦。一鋒事前拍了好多香港街景的相片及航拍片段，加上美漫流行的Map Painting做法，在真實相片上作畫，畫面比鋼筆畫更真實細緻，也更容易表達速度感。Marvel就曾出過這樣的漫畫集，這是在美國挺流行的畫法，但在香港倒很少見。講到今日仲入行畫港漫，好似好慷慨就義咁，呢位「總覺得好掂」的新晉漫畫家，卻覺得雖然難搞，但路比以前更多了：「有好的故事當然重要，若有好故事，往後可以變成Game，變成電影。我覺得香港市場其實擴張得好厲害。港鐵都用動漫風啦，大陸又有好多漫畫平台。我梗係希望第日《大災難師》可以拍電影啦。我會想揀Marvel囉，DC票房好似唔太好。如果任天堂搵我都好呀，佢咁多雜錦格鬥Game，若可放我一個角色落去就好了，或者都可以搵我做環保、和平大使的，啲自然災難好多都同環境變化有關，我都可以幫手宣傳呀。」

記者：陳慧敏
攝影：張志孟

source : https://hk.lifestyle.appledaily.com/lifestyle/special/daily/article/20180727/20461221
+++++++++++++++++++++++++++++++++++++++++++++++++++++++++++++++++
真係畫出彩虹