事隔大半年，最受大家歡迎（？）嘅《叮噹法寶物理原理大解構》系列終於返嚟啦！唔好意思要各位等咁耐，因為小弟近一年比較忙同開始「江郎才盡」，開始諗唔到咩嘢好嘅叮噹法寶題材去講 PS: 其實最大原因係小弟懶 [自 ] 點都好，今次繼續同大家探討吓叮噹法寶運作背後（可能）嘅物理原理

[blue]隱形斗篷（隠れマント）[/blue][/size=5][/b]


隱形技術呢種科技從來都係人類一直夢寐以求想開發同操控得到嘅其中一種，係唔少漫畫、科幻小說、電影都會有嘅題材，好似《Hollow Man 透明人魔》甚至係哈利波特咁。叮噹作為嚟自先進未來世界擁有過千件法寶嘅「萬能」家用機器人，當然都有可以實現隱形技術嘅法寶，嗰件法寶就係隱形斗篷。隱形斗篷係叮噹漫畫入面常見嘅法寶之一，又叫隱形披風、隱身斗蓬、隱形布、隱身布等，係叮噹嘅其中一個常用法寶。外形係一般嘅披風，用法好簡單，只要將披風蓋住物體件物體就會變透明，好似披喺身上面，身體就會變透明。不過必須要完全披住身體先會完全隱身，唔係嘅話會睇到冇蓋住披風嗰一部分身體。

咁究竟隱形斗篷呢類法寶或工具我哋身處嘅現實物理世界又有冇可以實現到呢？抑或隱形技術永遠都只會係人類嘅幻想呢？答案都幾肯定係有，而且呢種技術仲已經接近面世啦！

[blue]「違反常理」、擺脫自然世界限制嘅神奇「物質」— 超材料[/blue][/size=5][/b]

(Credits: xkcd, https://xkcd.com/1351/)[/size=2][/b]
喺講物理上點實現隱身技術之前，小弟想首先講吓乜嘢係超材料（metamaterials），一種同實現隱身技術好有關係嘅新興材料科學研究範疇。超材料雖然叫「超」「材料」，但佢其實唔係咩新發現或新創造嘅神奇物料。佢其實係一種透過設計同組合物理結構去令材料實現出自然世界冇嘅特殊物理性質嘅人造材料統稱。嗰統稱雖然有啲誇張，但絕唔係好似「一國兩制」咁名不符實嘅大話 超材料的確配得上「超越天然」材料呢個稱呼。超材料背後原理就好似大家聽得比較多嘅化學或生物基因改造工程，科學家可以透過排列同組合唔同嘅化學元素原子或生物基因序列去因應需求改變化合物嘅特性或操縱有機體/改變細胞嘅遺傳物質，甚至係創造新嘅化合物或物種咁，超材料呢項技術唔同嘅只係佢係用物理手段，透過設計同改物理結構去創造「新」物料，例子有好似下面幅圖嘅磁性開口諧振環（split-ring resonator）。