【法政巴絲】我只想身體健康 身體健康真係好緊要。

回想以前我仲係細路嘅時候，為咗自己嘅興趣成日都捱夜。當時無論係屋企人定係朋友都話：「捱夜對身體唔好，第日你就知！」講還講，細路邊會聽咁多呢啲嘢吖，於是捱下捱下，開始多咗感冒，一個月睇幾次醫生。到後來情況係有改善嘅，但係身體差咗就係差咗，於是認識我嘅人都知道，我好易病。

個問題係，出嚟做嘢，捱夜嘅機會唔會少過以前，而病又係一個大忌。試諗下如果有單審訊進行緊，其中一邊律師代表病咗，令到審訊要延期，大家都會難做。所以我見過有大狀打打下官司病咗，都一樣頂硬上，上庭果陣飲多兩杯熱水，返chambers就即刻食藥再準備官司，第日繼續上庭。真係見到都戥佢辛苦……

當然，幾小心避免都好，如果真係病得嚴重，我相信大家係會理解嘅。有次上庭見到有leading counsel話佢嘅junior病咗無法出現，並且代表佢表示抱歉，當時法官都好貼心咁講咗句祝佢早日康復。

不過，唔好話影響上庭，生病本身都唔係一件好事。身體差就自然搞到心情都差，狀態唔好又點樣好好生活呢？有個前輩都語重心長咁同我講過，得閒就做多啲運動，同埋注意下飲食，因為佢就見過有朋友人到中年患上重病嘅不幸經歷。而家佢自己都唔怠慢，會好有規律咁做運動，而且真係唔食任何高鹽高糖高脂肪嘅食物。

我慢慢明白到，原來人喺對任何事情負責之前，先要對自己身體負責。身體健康唔係淨係一句祝福語，而係我哋向前邁進嘅動力。於是我而家都提多咗自己注意健康，郁多啲、食清啲，希望遲啲可以同人哋講，我真係好耐都無病喇！

藍天柳 @ 法政巴絲

法政「巴絲」－法律界的「巴打」和「絲打」。不知絲襪奶茶，配以豆腐火腩飯，會是怎樣的味道？當浪漫的男人，遇上活潑的女孩，又會擦出甚麼樣的火花？讓法律界的朋友一起來，同大家赤裸裸 gossip 呢行嘅八卦趣事。

上一則
【短片】【地下天文台×蘋果】為何天氣預報不準確？超級電腦大解構
下一則
下一則
【短片】路見不平仲要等？《蘋果》調查組等你爆料！
蘋果日報fb，每日分享精選新聞及網絡新鮮事。
返回最頂
https://hk.news.appledaily.com/local/realtime/article/20180818/58578575