https://video.appledaily.com.hk/mcp/encode/2018/08/18/3677856/20180819_sub435newnewAD_mp4_clean_w.mp4


Stanley要對所有樂器及曲譜有一定認識，才可勝任指揮一職，所以要不停上課進修。　

年初，香港教育大學教育政策與領導學系做了個調查，指香港年輕一代中，10個有6個係月光族；另一邊，金融科技初創企業Gini於去年12月，訪問了500位80後、90後，有三成受訪者「唔知啲錢使咗喺邊」。在這人工唔加，衣食住行乜都加；樓價點都追唔到，遠大目標遠到車尾燈都望唔到的年代，人心只想活在當下，月光，好奇咩？　

Stanley
職業：指揮家
年齡：30
平均月薪：約20K
存款：0

冇樓冇車200萬換音樂Cert
「好多人說我是月光族，其實我都唔係好光箒。」30歲的楊帆（Stanley）是個音樂家，演奏會指揮、中提琴樂手、鋼琴老師──通通都是他。facebook上的他一身「踢死兔」，於演奏廳指揮管弦樂團，無論點睇都係中產才子；但眼前一身T shirt短褲、坐在地下打機的他，卻說自己只是一位收入不穩的Slasher。接受訪問時，他於銀行有3萬港元存款，原來已是歷年高位，有時則跌剩4位數字。嗯，一額汗。

我知喇，佢一定成日食好着好，養車去旅行，兼洗腳唔抹腳啦！咦，但係佢每日平均工時只有兩個半鐘咋喎，吓？

接一次指揮工作連排練，收費一至兩萬，平時就做鋼琴老師的他這樣答我：「閒日大家都只係夜晚先練琴嘛，想搵多啲錢都冇。我在家就多花時間練琴、看書同學外語。星期日最多生意，但我好衰，想留來陪女友（笑），咁搵錢都係為生活箒，我哋得周日相處，如果咁都冇埋，唔得喎！」

以目前樓價市況，二人絕不考慮買樓，「根本講難聽啲係黐×線的，我打個比喻，就好似用成千蚊食碟叉飯咁。」早年他住沙頭角，700呎村屋連天台，包埋免費泊車位先7,500港元，閒時開車去郊野公園、海灘，勁舒爽；後來搬回大埔，佢第一件事就是賣車，「乜都加，呢幾年去茶餐廳食飯，都起碼加咗三成啦，屋租又唔同晒！單是泊車位都要二、三千元一個月，原來郊遊一次的油費好貴，加埋爆胎、壞車同保險。索性唔開車就省好多了。」


每日平均工時2.5小時，其餘時間練琴、看書，學外語。


Ida陪Stanley前往歐洲報讀演奏課程，順便去埋旅行！


以為賣掉愛車會不慣，但搭巴士的日子都好方便，Ida笑說：「仲有埋司機，去邊都唔使煩啊！」

不開源不節流　女友：佢係佛系儲錢
咁，啲錢去咗邊呢？他拿出厚厚一本Cert，「我見到啲歐洲演奏大師班，忍唔住又去報。為期一星期的課程，動輒二、三萬元。」嘩，噴血，但Stanley個表情興奮得有點像sales，「但佢有成隊專業交響樂團任你耍喎！加埋機票、酒店，再喺嗰邊玩多幾日，去一次都要5萬蚊。最癲係16同17年，去咗四次呀！」幾年的積蓄，化成桌上一大叠英國音樂學院畢業證書、大師班證書，總值起碼200萬。財散人安樂，人到三張，朋友有車有樓，他卻無所謂地說：「我有好多張Cert啊！」

這時女友Ida話：「佢係佛系儲錢，即不開源，不節流，錢自然會儲到。」全屋爆笑。「我識佢時，已知音樂家收入不穩，他有時到歐洲比賽都有成本；但你不進修、不比賽又會踎墩，仲衰啊！所以『月光』都有原因；而且我的安全感，從不來自男友有幾多錢，我就是我自己的安全感。」現時二人夾份租屋，生活費則平分。放假在家打機，拖手逛公園海旁，又或搭一程巴士去新娘潭，生活一樣梳肝，「我們想做的事，都不必花大錢，不想買樓，婚禮不要大龍鳳，簡簡單單就好。」

今年Stanley踏入29+1，與此同時，他與音樂朋友們開公司接現場演奏的工作，為婚禮、活動及微電影等創作專屬配樂或主題曲。開源也。儲錢就有了根基，「以前儲到十萬好開心，但因為冇目標，使使吓又冇咗，?家易儲好多。」不過剛才我收到Stanley訊息，「我報了個比賽，成功出線到歐洲比賽，意味着我的戶口又要重入月光境界了。」

記者：陳慧敏
攝影：伍慶泉、許先煜

source : https://hk.lifestyle.appledaily.com/lifestyle/special/daily/article/20180819/20478707
+++++++++++++++++++++++++++++++++++++++++++++++++++++++++++++++++
再搵到冇問題吧