球場上經常會出現一啲感人嘅畫面，不過今次呢個就夠晒特別，荷甲球隊飛燕諾連同一班球迷喺星期日嘅主場賽事入面就為一位患病嘅小朋友送上難忘一刻。

飛燕諾喺星期日嘅荷甲賽事主場大勝精英隊3:0，不過今場嘅焦點並唔係有份入波嘅老將尹佩斯，而喺一位獲得球會邀請入場睇波嘅小朋友。喺比賽到19分鐘嘅時候，球場上層看台嘅球迷就將無數事先準備好嘅毛公仔掟落下層，嗰位小朋友所在嘅位置，令球場落起一陣「玩具雨」。

呢個畫面震撼之餘，亦感動到一班作客嘅精英隊球迷暫時放低敵對身份，同一班飛燕諾球迷一齊為嗰位小朋友送暖。唔少網民睇到呢段短片之後都話好感動，仲話如果佢哋國家嘅聯賽都可以咁樣，而唔係兩邊球迷互掟煙花爆竹咁就好喎。

https://hk.sports.appledaily.com/sports/realtime/article/20180821/58589080