鋼鐵人Elon Musk近日忽然在Twitter話準備將Tesla私有化，講到似層層，話錢已到位，只係等簽文件云云，市場譁然。Tesla係美股歷史上俾人short得最勁嘅公司，Elon Musk話忍夠啦，係時候爆發。

但轉個頭，佢又話其實個計劃未係咁實在，原來佢同中東資金有少少誤會，所以私有化所需要嘅錢，其實係未鎖定，市場更譁然。
近日Musk嘅行徑，不禁令人懷疑，佢嘅精神狀態如何，事關佢成日強調，自己為咗要解決Tesla嘅生產問題，日日落廠做足十二個鐘，仲要時時連續幾日喺間廠瞓埋覺，香港人會醒起，董伯當年類似嘅七十一言論。

Musk不嬲都出名工作狂，無人懷疑Musk係吹水，睇佢近日嘅表現，更加令人相信佢真係咁chur。Chur到咁，影響到精神都唔出奇。經此一役，short佢股票嘅資金，隨時再上一層樓。

其實呢個係創業人通病，喺業界好普遍，唔理你間公司係整火箭上火星定係幾條友整隻app。一方面，係責任下放問題，越覺得自己能力高嘅人，越容易出事。你睇吓Musk，佢係Tesla嘅主席兼CEO，同時又係SpaceX嘅CEO兼首席設計師，就明白無約束底下問題可以去到幾嚴重。

Musk乜都攬上身　Bezos睇長線變大隻
創辦人覺得自己好打得，周身刀張張利，呢種心態我明白，但退一萬步講，就算真係咁打得，一日廿四個鐘冇得多，事事攬上身，時間上合理嗎？創業開頭唔夠人手，乜都做係為勢所逼，但係如果變成習慣，就好難搞。記者問Musk幾時終於請番個COO，佢話搵唔到個勁過自己嘅人，遲些再算，就係典型嘅心態。

另一方面，就算Musk有幾多或幾少職銜，佢都係會chur盡自己個schedule，佢成日話為咗拯救人類，一秒都唔可以浪費。但其實就算唔係要拯救人類，創辦人絕大部份當公司係個仔女，應該話隨時仲重要過仔女，係畢生嘅代表作品，對於輸，係有好大恐懼，好似輸咗就等於成世人都係失敗咁，所以要盡力做，如果就係差做少咗一個半個鐘，而後來失敗咗，就會怨係衰自己懶惰。有人以為創業做老闆就輕鬆，實情係我差唔多未見過創業人返工少過一般打工嘅時間。

我自己成日都有呢個恐懼，或多或少。你問，咁其實大家係咪真心覺得一星期做一百個鐘同百二個鐘在成績上會有分別？我估唔係，但係加鐘本身係最容易同最明顯最唔使創意嘅方法，加鐘等如盡咗努力，對得住自己，一旦變成習慣，就會慣性出呢招，而呢招，明顯係有代價，尤其當自己唔再係十八廿二。

當然唔係話返得越少越好，但我未見過懶嘅創業人，成行都係傾側去過勞嗰面。Musk嘅反例子，係Amazon嘅Jeff Bezos，佢之前俾人影到大大隻隻，同三十年前賣書時嘅文弱書生樣差好遠，張比較相片仲變成meme瘋傳。報道指Bezos唔會約朝早開會，唔校鬧鐘自然起身，夜晚仲幫手洗碗，而佢無耐前成為世界上最有錢嘅人（當然Amazon裏面好多人做到死死吓係事實，不過係另一個話題，Tesla都好多人死死吓）。你睇佢嘅核心班底，平均跟咗佢超過十年，而佢自己由創業第一日開始，就不停強化幾個核心文化價值，貫徹到今日早已經收成。我幾肯定，如果佢宣佈自己放假一年，市場係唔會有反應。

Jeff Bezos肯定自視甚高，亦肯定當間公司係生命，所以係過勞高危族。我懷疑，佢成日話要睇長線，就係要平衡番過勞嘅衝動，關心自己健康。如果佢係世界上最過勞高危，咁就要用番咁上下長度嘅長線去平衡，咁樣諗，幾年前佢走去沙漠用三億起個萬年鐘嘅行為，又忽然間變得好合理。

撰文︰宋漢生

source : https://hk.lifestyle.appledaily.com/lifestyle/tech/daily/article/20180823/20482241
+++++++++++++++++++++++++++++++++++++++++++++++++++++++++++++++++
Musk 好似精神病