http://hk.apple.nextmedia.com/enews/realtime/20131012/51803481

今集《最佳女主角》，嘉賓仍然係毛毛毛舜筠。當年毛毛同哥哥張國榮青梅竹馬，更曾發展成戀人；即使最終未能成為伴侶，但兩人多年來友情從未改變，親如家人。今集毛毛被問到關於哥哥生平軼事，難免令毛毛再次觸及傷痛回憶，但她仍然很希望能與觀眾分享這些，讓大家明白，抑鬱症能殺人於無形，希望大家能及早正視問題，以及關心身邊的人。

訪問中，毛毛憶述哥哥患病之後，有一次曾經好堅持一定要搵毛毛出來見面談心。當時毛毛正陪伴雙親，未能應約，但哥哥堅持說，想現在就見到她。毛毛說:「佢問我0依家喺邊度？我話我喺中環，佢話:『中環就啱喇，我依家同你傾偈，有啲嘢想同你見面。』但我當時真係有嘢做，哥哥就話:『咁…再通電話啦。』」毛毛謂，後來才知當時哥哥已有事，但當時她不知道，以為只是哥哥任性耍性子而已。

後來毛毛與哥哥再見面，其時毛毛已知悉哥哥患病。回憶那次見他，毛毛說:「嗰次見佢，我就知大件事，好嚴重。」她謂哥哥曾經用過很多方法，希望可以幫到自己，可惜事與願違。再見到毛毛時，其病情已變得很嚴重:「佢猛問我一個問題，好好笑，佢問我，你經濟OK嘛？我話冇問題，你點解咁問呀？佢話冇嘢，你知我乜嘢都問0架啦。我話，哦。但當其時見面，佢震得好緊要，同埋未停過食煙，佢戒咗煙0架喇，又食番，同埋你見到佢個人好nervous，不斷揸住支煙，左右手不斷震，佢要用腳壓住一隻手，但另一隻手仲喺度不斷咁震。」

那次見面，除了毛毛和哥哥兩人，還有哥哥的友人。毛毛沒有透露是誰，但就表示氣氛很不妥。突然間，哥哥跟她說:「如果我死咗，你要同我行基督教儀式。我當其時話，唔好講呢啲嘢啦，做乜講呢啲嘢啫？但哥哥同我講:『你記住喇喎，你記得喎。』咁我就話，不如我同你祈禱先啦，於是同佢一齊祈禱，我祈完禱後擘大眼望住佢，原來佢一直望住我，一路係咁望實我，眼神令我覺得幾驚，支煙仲揸住，手仲震緊，佢又好似唔想再講落去。佢俾我嘅感覺係，佢冇乜選擇去處理佢個問題，但我又唔敢斷定。可能佢做咗好多嘢，都失敗，所以佢屋企人叫佢乜嘢都唔好做，但佢又覺得好似爭梗啲嘢咁，咁我都未試過阿毛嘅方法，可能阿毛有方法呢。」

毛毛謂之後曾請教有關醫生，知道哥哥的情況是需要一整隊人去幫助他，可惜未幾便收到哥哥的死訊。當時她和丈夫在家中，丈夫在跑步機上，聽得新聞報道，嚇得跌了下來。告之毛毛，毛毛不信，問:「係唔係宣傳呀？有冇新戲上呀？」馬上打電話給哥哥，及哥哥的好友，但沒一個電話接得通。這時毛毛腦海中忽然浮起哥哥那句話:「如果我死咗，我一定要行基督教儀式。」毛毛當時亂了:「點呀？我應該講俾邊個聽呀？呢個係咪…佢嘅遺願嚟0架。」

後來好不容易之下，毛毛終於將哥哥這番話，告之其身邊人知悉，可惜在喪禮上，毛毛發現並不是行基督教儀式，但她說:「係乜嘢儀式都唔重要了，喺當其時，雖然我好希望哥哥心願可以達成，但我更希望佢身邊嘅人唔好為呢件事太難過。」毛毛又謂，如果哥哥當初沒有離開，他現在肯定已經無敵了，因為有內地市場，屆時哥哥想拍甚麼也可以了。可惜如今只能說，如果。