http://hk.apple.nextmedia.com/enews/realtime/20131012/51805944

陰功，今晚《星夢傳奇》誕生四強，向高難度挑戰獻唱《木紋》嘅羅鈞滿表現失準，第二句已經唱錯歌詞，而且明顯給其餘四位參賽者比下去。最後終於以最低分出局，入圍不久的鄭世豪就成功殺入四強。評審宣佈最後邊個入圍，當時只餘下鄭世豪同羅鈞滿，宣佈一刻話:「係羅鈞滿…身邊嗰個…」分明整蠱喎。

鄭世豪成功殺入總決賽，後來居上，宣佈一刻泣不成聲。羅鈞滿就好硬淨，話:「好開心可以嚟到呢集，呢條路唔易行。每一集我都希望可以吸取教訓及經驗，為咗我將來嘅路。我唔會放棄唱歌，我真係好鍾意唱歌，以前我唔敢講…我真係好鍾意唱歌。」佢又話好感謝每個曾鼓勵佢同讚佢嘅陌生人，亦特別多謝家人一直支持。未知女友張文采今晚有冇到場支持呢？

不過喊得最勁嘅，唔係羅鈞滿，佢冇喊，反而喊得最激動，係成功入圍嘅鄭世豪同佢嗰張唔知邊度忽然殺出嘅紙巾。因為喊得太勁，反而要羅鈞滿安慰番佢轉頭；而台下嘅處女馨王君馨，得悉賽果後亦不停流淚。佢成晚都喺度講《星夢》係個family，感情好深，此言非虛。

最後無綫仲安排出局嘅羅鈞滿solo再唱一曲，佢選唱咗張學友嘅《寂寞的男人》，歌路完全開正佢嗰瓣，唱得好過《木紋》多多聲。如果唔係揀錯歌，結局會否不一樣？網民就狠批羅鈞滿唱《木紋》嘅表現:「中間啲詞唱錯晒，啲字完全咬唔清，首歌未練熟..」、「好怕佢啲震音，似個唔識唱歌的人震法」、「唔掂，根本駕馭唔到呢首歌，而且走了音呢。」、「聽得出佢好攰!」、「歌詞唱錯咗，啲旋律唔同晒，阿詩首歌變到怪怪。」唔緊要，正如羅鈞滿自己所講，佢係唔會放棄唱歌0架，繼續努力!