47歲李麗珍回春後，的確係青春咗唔少。

47歲嘅李麗珍幾年前為還原靚樣打回春針，而珍妹同潘源良經歷20年，最後都喺番埋一齊再續前緣，好多人都戥佢哋開心。仲有傳佢哋喺今年年底拉埋天窗。今日珍妹出席由志偉擔任監製嘅無綫新劇《Aerobic Girls》，同其餘6位「90年代女神」，李若彤、葉蘊儀、陳慧珊、張慧儀、袁潔瑩同埋江欣燕齊齊現身記招。

被傳同潘源良結婚嘅李麗珍就否認婚訊，佢話：「幾時有結婚呀，佢仲忙過我。」講到16歲嘅囡囡同男友嘅關係，佢話：「佢o依家係少女反叛期，我唔會強迫佢，等佢大個啲明白咗再算。」佢話囡囡將會去加拿大讀書，到時將會請假一星期陪佢開學。而飾演李麗珍後生版嘅新人王敏奕，似唔似就見人見智，不過勝在青春可人囉！

而另一位「90's女神」，當年被喻為「玉女派掌門」40歲嘅葉蘊儀已為人母，自然豐腴少少，身型的確不及當年，難逃師奶命運。志偉就搵嚟糖妹飾演佢嘅後生版，不過坦白講糖妹明明就似陳慧嫻，一啲都唔似葉蘊儀啵，唯一得個身型有啲似，都係圓圓哋。