https://hk.news.appledaily.com/local/daily/article/20180929/20510712

2018年09月29日

輔警淪為階下囚　
楊逸朗初心未變　
燈蛾甘願續撲火


楊逸朗指入獄16個月後重獲自由，發現不少戰友已淡出社運，香港人亦似已不再關心如何爭取民主。周智堅攝


【傘運四周年】

從執法者變成抗爭者，由天之驕子變階下之囚，4年前一場雨傘運動，改變了楊逸朗（Joe）的人生軌迹。將屆25歲的他兩個月前重獲自由，驚覺在打壓下，昔日戰友已淡出社運前線，賭上性命守護的城市亦日漸失去光芒。

在這最壞時刻，小伙子目光依舊清澈，堅持當日走上街頭的初心，甘願做撲火燈蛾，盼以熱誠再次激勵同路人，「因為我相信每一個喺雨傘裏面經歷感動嘅人，佢哋唔會咁容易忘記呢個感覺」。

記者：佘錦洪


傘運初期特首辦外一張與警員握手的合照，令Joe成了黃藍陣營公敵。他日前應記者邀請重返現場，憶述當日代表一眾留守者與警方交涉退場，「當時剩返好少人，如果我哋再留喺呢度會越嚟越危險」，快門一響，「佔中輔警」名號隨相片流傳網絡，他亦從此「兩面不是人」，「個決定我依然覺得係啱嘅，可能個錯誤係未必要握手，亦都未必要由我去出面囉」。


傘運初期在特首辦外一張與警員握手的合照，令Joe成了黃藍陣營公敵。
資料圖片


「我同一班青年叫做保護啦，希望唔畀警察拉走黃之鋒佢哋，捱過一晚，居然就佔領咗政總外圍道路啦。」

2014年9月26日晚上，雙學帶頭衝進公民廣場，為佔領運動揭開序幕。再次立足添美道，Joe以參與者身份再度講述事件，「我同一班青年叫做保護啦，希望唔畀警察拉走黃之鋒佢哋，捱過一晚，居然就佔領咗政總外圍道路啦」。終於早上人頭湧湧，市民從四方八面趕到，「嗰陣時我好記得，我有用手機影低朝早黎明，好似香港有希望」。

對破曉的盼望，僅持續了兩個月。11月30日晚上，雙學發起最後的升級行動。Joe穿起全副裝備，守在衝突前線，眼前一幕卻令他頓感「怒其不爭」，「好多戴晒裝備示威者，佢哋企喺後面向前面嗌『衝呀衝呀，仲等乜嘢』」，混亂中Joe被防暴警察扯出陣列，按在地上拳打腳踢，「我不停嗌不停嗌，點解冇人去呼應我嘅呢？原來係其他人都走晒」。

傘運在無力掙扎後慘淡收場，但Joe未有氣餒，「喺我眼中只會睇住一啲肯堅持、肯去繼續做實事嘅戰友，只要一日有呢班戰友，我都會堅持」，學運、社運處處都可見他的身影，直到鋃鐺入獄之前。

2015年底立法會外垃圾桶起火並爆炸，有份參加當日反網絡23條集會的Joe被裁定串謀縱火罪成，判監兩年。他指當日集會人數稀少，其間發生混亂兼響起火警鐘，集會者四散，「返屋企睇到有個垃圾桶着火兼爆炸」，幾日後就有警察上門拘捕，「好似一場噩夢，一場唔真實嘅夢」。

獄中年半，外間早已變天，連番政治檢控，重挫搖搖欲墜的激進社運圈子，「當我一啲朋友嚟探我嘅時候，我不停問出面點啊，佢哋都講唔出啲咩，『都係咁囉，好靜囉』」。好不容易重獲自由，他發現所有人已被現實磨平銳氣。

Joe希望以自己為橋樑，重新凝聚戰友，「我哋有幾耐冇坐低落嚟去傾偈、去關心大家、去真正討論返香港社會點樣發展呢……透過一啲聚會、傾偈，可以知道原來你哋都願意出嚟，你哋依然喺呢度，依然喺香港」。

政權兇猛，明知不敵，飛蛾依然會撲火，「我係咪好似飛蛾咁戇居呢？但係我覺得呢個就係我」。


上一則
上一則
陳健民：不會被官司摧毀信念

下一則
下一則
被囚16月　出獄怕自由



內地生看「傷疤」尋真相

陳健民：不會被官司摧毀信念

被囚16月　出獄怕自由

遮打自修室感受動人時刻　女生棄文學讀社工

傘運4周年 筆架山現「反23條」直幡

「未能撼動政權　但已感動人心」有傘有聚