（互聯網）

「執波仔」呢個詞語大家叫慣叫熟，不過嚟緊可以要改口叫「執波女」！意大利丙組球隊維琴察最近搞搞新意思，將慣常用嘅「執波仔」全部撤換，改成一班衣着性感嘅「執波女」代替，呢個舉動喺意大利球壇引嚟極大爭議，事關呢班「執波女」全部着晒小背心加熱褲，造型非常Sexy，更加大問題係佢哋全部都係未成年少女，難怪會畀全世界炮轟。

面對各界批評，有超過100年歷史、97年贏過意大利盃冠軍嘅維琴察就解釋，話所有「執波女」都係來自一支排球隊嘅U16隊員：「我哋呢個安排係為咗提升對女性運動嘅關注，呢班細路女唔應該受到批評，佢哋嘅衣服亦係一般青少年日常所着，完全唔係暴露。」就連排球隊亦發聲明話，對外界嘅反應始料不及，呼籲大眾應該由運動角度去睇呢件事喎！

來源 source: http://hk.on.cc

+++++++++++++++++++++++++++++++++++++++++++++++++++++++++++++++++

不俗不俗