上星期，facebook旗下有兩單新聞。先係Instagram CEO宣佈離職，然後幾個月前辭咗職嘅WhatsApp CEO接受訪問，暢談自己幾頂唔順facebook嘅管理層同Zuckerberg。

FB、IG、WhatsApp，加埋Snap，係幾有趣嘅故事。從前，有間FB，做到social network中嘅龍頭，最大最惡係佢。有一個比佢大得多嘅Google，打晒開口牌想踩入佢嘅社交地頭，來勢洶洶，FB如坐針氈。而做社交起家嘅FB，比任何人都更清楚，network effect有幾屈機。兩樣加埋，FB嘅策略，係買買買，任何做到大嘅social network，都要收歸旗下，有買貴冇買錯。

於是乎，2012年用10億美金買咗IG，2014年用220億美金買咗WhatsApp。佢早喺2013年已經出價買Snap（當時仲叫Snapchat），但係一路食檸檬，最終Snap自己上市。三個目標，得到兩個，但起碼得唔到嗰個，最後都冇投靠死對頭Google，而Google雷聲大雨點小嘅Google+，學老董話齋，冇再提，即係唔存在。

IG喺2012年歸降，創辦人做多六年先離開，喺業界係一個異數，間接證實咗，IG一直真係幾高度自治，不過高度自治嘅承諾總有盡時，FB近排谷極唔起，帝國管理層開始向上極都仲有嘅IG埋手，越來越多干預，想好積極咁將IG嘅用量過畀FB，終於IG CEO頂唔順，自行退場。之前大帝一路唔出手，可能係計過條數，仍然要IG CEO嘅能力對付頑抗嘅Snap，但而家Snap已無甚威脅，係時候無顧忌咁喺IG身上榨多啲着數。

WhatsApp CEO提早走人兼去贖罪
至於WhatsApp，2014年歸降，因為Google搶高個價，同埋佢獨家手執千萬用戶嘅電話號碼，搞到FB用220億，即係IG兩年之前嘅22倍價錢先買得到，我估，其實Zuckerberg當年條氣已經唔係好順。仲要WhatsApp嘅CEO麻麻煩煩，喺賣身契度加多個條件，要FB應承唔會逼WhatsApp賣廣告。大佬，FB成個商業模式就係賣廣告，以收入來講同Google並列全球最大廣告公司，唔畀佢叫WhatsApp賣廣告，咪即係玩嘢。Zuckerberg忍住先，買咗先講，終於今年開始對WhatsApp毛手毛腳，WhatsApp CEO頂唔順，提早走，袋少9億美金走人。

將三個目標嘅創辦人放埋一齊睇，最順攤歸降嘅係IG，然後係WhatsApp，堅持到最係嘅係Snap。有趣嘅係，最同FB理念相異嘅，係WhatsApp，佢對廣告嘅抗拒，係大到一滴都接受唔到，佢仲以為前排做埋點對點加密，就正式封鎖咗路徑，令帝國逼唔到佢賣廣告，因為廣告要出賣私隱先賣得起錢，點知發現原來管理層為廣告竟考慮打加密嘅主意，所以只捱到四年仲要留低錢走。當然，冇人會同情億萬富豪，不過佢都好清醒，喺訪問度話，佢歸降得FB，攞得FB錢，就係一個sell out，就係以用戶嘅私隱謀私利，應該預咗有咁嘅一日，冇得扮天真。佢近排拎嚿錢投資一間類似WhatsApp、但聲稱永不賣廣告嘅公司，大概就係贖罪自療嘅一步。

IG歸降之後，借住FB嘅資源越做越大，成為帝國嘅現金牛，佢唔使自己起個廣告商平台，廣告商本身用FB嘅自助廣告平台落FB廣告，之後只不過用同一平台順手落埋IG廣告，喺呢個角度睇，IG同FB雙贏，而隨住IG不斷抄考Snap，成功圍堵Snap，令Snap好難搶到帝國嘅用戶，到今日，IG嘅活躍用戶，多過Snap同Twitter加埋超過一倍。Snap嘅monetization同Twitter一直海軍鬥水兵，一直都係股價低沉嘅其中一個主因，睇怕冇乜可能喺可見將來威脅到Google同FB帝國嘅廣告地位。

撰文︰宋漢生

source : https://hk.lifestyle.appledaily.com/lifestyle/tech/daily/article/20181004/20513908
+++++++++++++++++++++++++++++++++++++++++++++++++++++++++++++++++
其實FB大禍臨頭