https://video.appledaily.com.hk/mcp/encode/2018/10/06/3708219/20181007_sub267AD_clean_w.mp4


患有抑鬱症的Momoko不期望別人真正理解自己，只求別人願意踏出這一步。

「唔好唔開心啦！」、「睇開啲！」、「做乜咁負面？」這三句話，哪句最適合跟抑鬱症患者講？患上抑鬱症四年的Momoko說：「其實呢啲『關心』同殺我哋係冇分別。」

四年前，從事保險業的Momoko情緒長期低落，酗酒、失眠令她陷入低潮。「個心好似長期有嘢壓住，總之好唔開心。」自殺念頭不停在她腦中浮現，直到有一晚，她突然想一躍而下了結自己，「撳住自己，即刻衝返屋企，然後第二日就即刻睇醫生。」確診為抑鬱症後，醫生在這幾年間為她處方過不同藥物，現時每日都要服食十多二十顆藥丸，令自己鎮定下來，不會失控。「有冇好明顯嘅效果？我覺得冇。只係個腦一片空白，諗唔到嘢，令你唔諗自殺，但情緒依然喺度，每日好似俾人打完一身。」全身骨痛、頭痛頭暈、胃痛、食慾時多時少、只能倒頭大睡、體重上升30磅等副作用反而更刻骨銘心，「但都一定要靠藥物控制住，唔食藥會即刻發顛，情緒會失控到比起食藥更痛苦。」因病停工的Momoko，現在每日的生活就是逼自己多做運動，或游水或跑步，「咁就可以攰到冇力去唔開心」，又或者留在家中，打理她的instagram，「通常都喺屋企，有時會出去同朋友飲酒、唱K。」


Momoko（左）和Carman（右）相識十多年，二人非常友好。


Momoko在今年初開設instagram（ID：iamfinety），寫下抑鬱症患者的心聲和鼓勵說話。

Momoko有個instagram（ID：iamfinety），一打開，全是黑白相間的圖片，每張都寫有一句短短的說話。黑色代表抑鬱症病人的想法：「抑鬱症那種無助、那種無力，你都完全不懂，別再跟我說我只是不開心。」而白色就是正能量：「其實我每天都會被這個病打倒，只是我每天都會重新站起來。」每句都由Momoko親手寫下，再儲存在Google試算表中，每日張貼3至4個新帖文，「黑白相間當然因為好睇啦，但更重要係，如果只係一堆黑色，本身有抑鬱症嘅患者睇到就只會向差嗰面諗；如果只係一堆白色，佢哋又會覺得你根本唔明佢個世界諗緊乜。但其實我明，我明我哋係好想走出去，只係走唔出。」但白色的正能量，又怎樣出自一個還被困在抑鬱症中的病人手中？「其實最初白色嗰啲句子，係我畀自己嘅功課，逼自己去諗啲正面嘅嘢，慢慢就變成習慣，習慣將開心嘅事放大啲。」因為IG落了不少跟情緒病、抑鬱症有關的hashtag，不少患者都能輕易找到此IG，令Momoko認識不少同路人。「其實我係想救人，亦都係想救自己。」

能救人，因為她能以抑鬱症患者的身份去安慰別人，「我了解到抑鬱症病人嘅痛苦，所以想等佢哋知道有人同佢一樣。有啲嘢你唔需要講得好清楚，但大家都已經明白對方嘅痛苦。」曾有個患有抑鬱症的台灣女生聯絡Momoko，說她正在燒炭自殺，Momoko此時不斷跟她聊天、開解她，終在死亡邊緣將她救回來，「到佢清醒番，佢係會多謝我，同我講我救咗佢。」令人疑惑的是，兩個抑鬱症的人走在一起，會不會令彼此情緒更為低落？「大家都有唔開心，患者同患者間就係互相撐住，靠嘅就係互相了解同明白對方處境。喺絕望一刻見到有人明白自己，對我哋好重要。」

能救自己，當然因為IG是個讓她抒發自己情緒的地方。IG名叫「iamfinety」，是「I am fine, thank you」的縮寫。「好多人問你How are you，你就答I am fine, thank you。其實你唔係真係fine真係冇事。」Momoko的IG今年二月開始運作，她能有熱情不斷更新，全靠認識十多年的好友Carman，她說：「Momoko好想為抑鬱症病人做啲嘢，我就叫佢開個IG，寫低晒自己心入面嘅說話。」Carman做的不只是推動Momoko去找抒發的渠道，還有Momoko認為最需要的「盡力了解」。「我會同佢傾偈，放大佢開心嘅事。打俾佢第一句就問佢最近點、好啲未。」Carman笑言自己也不理解和明白Momoko的想法，「我估佢應該每日都有好多唔同情緒，好複雜。佢要嘅未必係你完全理解，但盡咗力，佢會感覺到。」

Momoko覺得Carman是個會盡她所能去理解或明白自己的人，「可能佢未必全部都明白，但佢願意去咁做，已經足夠。」在許多人眼中，抑鬱症患者就是負面、不開心，「好多人自以為某啲說話係關心，問我點解唔開心、點先會開心、可唔可以控制自己情緒。如果做得到、知道點解，我哋就唔係有病啦。」Momoko直言這類說話會令患者情緒更低落，絕對可以將他們殺死，「雖然我知道佢哋唔明白，但我都會怪佢哋，唔明就唔好扮明，亂講嘢只會令自己對人嘅關心變成傷害。」

患上抑鬱症四年，Momoko每日都徘徊在希望與失望之間，「除咗食藥都唔知可以點，好似喺一個搵唔到希望嘅地方搵希望。有時覺得自己好廢，唔知生存為乜，情緒每日都好反覆，亦控制唔到，我都唔知自己幾時可以好番。」說話可以殺人，也可救人，在關心和安慰抑鬱症患者之前，不妨停一停，思索清楚說話背後的目的，是例行公事，還是真正關心？有時，為安慰而安慰的說話不必多，Momoko說：「願意理解我就夠喇。」

記者：李煒汯
攝影：黃智琳、廖璟熹

source : https://hk.lifestyle.appledaily.com/lifestyle/special/daily/article/20181007/20516324
+++++++++++++++++++++++++++++++++++++++++++++++++++++++++++++++++
好慘