前幾日，一向用字冷靜，由香港去矽谷創業嘅朋友，喺FB上轉發了這幅圖，加上短短一句，"Holy shit!"

有一啲影像，你睇過一次，就記得一世，我估，對唔少人嚟講，呢張會係其中一張。

圖片係出自Bloomberg一篇偵查式長篇報道。內容概要，係有多方消息指，有力量透過硬件改動，靜雞雞入侵了美國巨企嘅伺服器，受害人包括Apple同Amazon。

Apple同Amazon都有自己嘅雲端，雲端裏有萬計嘅伺服器，伺服器用嘅motherboard，原來好多都係同一間公司出品，公司叫Supermicro，行內龍頭，Nasdaq上市，台灣人創辦，總部喺美國，不過員工好多係華人，連內部溝通都係用普通話。

Supermicro嘅motherboard，雖係自家設計，但係唔係自家生產，生產嘅係中國嘅外判廠商。今次的入侵，懷疑係有力量喺中國廠商落手，響原有嘅motherboard做手腳。

Supermicro一年賣咁多motherboard，唔係每一張都搞。主事人有方法知道邊啲motherboard賣畀高價值嘅目標，專係搞嗰啲貨，喺上面加多粒細過粒米嘅晶片，粒晶片喬裝到好似好普通嘅一粒常見零件，掩人耳目，而粒晶片可以做嘅，係直接控制motherboard打開度門，放外來嘅程式入去，即係打前鋒，幫後來嘅攻擊鋪路。

而Amazon同Apple等等巨企，各自有大量公司客同個人客。即係，你間公司，或者你個人，信咗Amazon嘅雲端，Amazon信Supermicro，Supermicro信中國外判廠商，然後原來信任鏈源頭嘅廠商，俾人威逼利透之下，早已經出咗事。

國際角力　入侵美國巨企伺服器
報道出街之後，巨企馬上出聲明，話絕對冇咁嘅事。同時，亦有唔少人對報道中嘅細節，提出疑問。到底呢篇報道裏面，有幾多係事實，會唔會係侵侵政府造單新聞出嚟，真係好難知道，但係已經唔係最重要，重要嘅係，將呢類事情浮上面。

國際角力間來諜往，不嬲大家都知道有發生，但通常係一個概念，一個國際版法庭版角落頭新聞，但呢一次，用到咁嘅影像，咁嘅細節，就將事情形象化到，有可能改變好多人未來嘅決定同行為。美國巨企一向鍾意中國生產夠平，喺監管成本控制喺某一水平之下，判去中國係好自然。

一旦戒心升到一個點，監管貴到一個點，條數就唔係咁計。本來當中國廠商係抵用嘅供應，忽然覺得原來似敵人多啲。而全球嘅雲端企業用戶，以後揀雲端嘅時候，個CTO腦海裏面，浮現出呢個影像，一啲都唔出奇。

當然答案唔會係自己起番個雲端，因為自己起，而零件商一旦出事，你自己換晒啲零件，肯肯定慘過等Amazon搞掂佢。而係會問，邊間雲端，用邊度嚟嘅零件？企業客戶嘅集體恐懼，比起政府層次叫人買邊個唔買邊個，對雲端供應商嘅影響，隨時更加深遠。貿易戰，規模似乎又拉大咗一格。

撰文︰宋漢生

source : https://hk.lifestyle.appledaily.com/lifestyle/special/daily/article/20181011/20519213
+++++++++++++++++++++++++++++++++++++++++++++++++++++++++++++++++
贏國又贏