同Bill Gates一齊創辦微軟嘅Paul Allen病逝。對九十年代玩電腦有留意電腦科技嘅一代人嚟講，微軟就係科技宇宙嘅中心，彷彿全部嘅事情，好嘅壞嘅，都係圍住佢而轉。微軟嘅神話，大家都耳熟能詳。好多人憎佢，但幾乎個個都服咗佢。

喺一個咁重要嘅帝國嘅故事裏面，Paul Allen作為共同創辦人收受嘅注視，確實算少，當然呢個係神話創作人嘅意願問題，Paul Allen得到嘅篇幅，比例上仲少過同Steve Jobs一齊創辦蘋果嘅Steve Wozniak。而Wozniak本自傳我有睇，Paul Allen 幾年前出嗰本，硬係的唔起心肝，始終未睇，淨係睇過書評當睇咗。

Paul Allen離開微軟嘅時候，公司只有五百人，屬於早期。微軟嘅變大，主要係佢走咗之後發生。意料之內，佢嘅自傳，講到明係要提供非主流史料，強調番其實喺微軟，佢先係大佬，好多重要嘅諗法，都係佢諗出嚟，Bill Gates只係負責過濾同執行，所以連自傳嘅書名都叫《Idea Man》，自詡係微軟嘅大腦。

我諗冇乜人懷疑Allen係咪微軟好多諗法嘅始作俑者，但微軟嘅成功，本身就係一個好講彩數嘅故事，Bill Gates嘅勁，係中咗好運之後，能夠將好運用到盡。佢同Steve Ballmer嘅執行力，喺當時微軟嘅情況，係微軟變大最重要嘅力量。我估，微軟冇咗Bill Gates，平行時空嘅走樣程度，會比起冇咗Paul Allen低得多。

因此Paul Allen喺提升自己貢獻方面嘅以正視聽，呢個嘗試好難成功。不過亦都證實咗，就算千億身家，有NBA球隊私人飛機同世界上最大嘅遊船，都總係會有買唔到嘅嘢，同埋彌補唔到嘅遺憾。另一方面，佢爆Bill Gates嗰啲嘢，反而大家更想八卦，最大嘅料，就係親自證實咗佢點解離開嘅都市傳說。

跟病魔搏鬥　被嫌冇貢獻
點解盛年都未到嘅Allen，會咁早期就離開微軟？一早確認嘅事實，係佢嘅病，當年就已經病發咗，要用唔少時間醫頑疾，少不免少咗時間返工。都市傳說嗰忽，係佢同病魔搏鬥嘅時候，有一日喺公司聽過隔籬房，Bill Gates同Steve Ballmer度計想攞埋佢啲股份，因為覺得佢個病會令佢越來越少貢獻，而Allen一聽到，即刻衝入房破口大罵，然後鐵定心即使醫番好都要離開呢班友，同埋長期分段減持公司股票。

雖然兩人都聲稱一早冰釋前嫌，但有傳Bill Gates知道本書嘅內容之後撻着咗，話同佢自己嘅版本好大出入。不過其實無論點反駁，大家一早認定，咁嘅行為好Bill Gates，甚至暗裏承認，佢嘅狠，喺微軟當年嘅語境裏面，係微軟大成功嘅重要因素。而正如同Steve Jobs共事嘅人無論點樣數佢幾乞人憎，教主嘅神話唔會受影響，就如幾卷死海卷動搖唔到官方《聖經》，Paul Allen注定係微軟神話裏面一個好好好有錢嘅註腳。

撰文︰宋漢生

source : https://hk.lifestyle.appledaily.com/lifestyle/tech/daily/article/20181018/20524260
+++++++++++++++++++++++++++++++++++++++++++++++++++++++++++++++++
邊會遺忘