https://hk.news.appledaily.com/local/daily/article/20181019/20525795

2018年10月19日

爆相爆片：裸男闖機舖「我似蠟筆小新」


一名男子赤裸跑入遊戲機中心，警員接報到場。


俗稱大馬路嘅青山公路元朗段，同大棠路交界一間銀行外面，前晚8點幾有一個男人突然當街除晒衫褲鞋襪，連埋手機耳筒全部丟喺地下，佢喺條街企咗一陣，仲笑笑口咁，途人都望住佢，有人偷笑，有人攞手機出嚟影，裸男之後跑咗大概30米走入大棠路一間喺地庫嘅遊戲機中心，當時呂先生喺度打緊機，佢話在場人士見有男人冇着衫跑落嚟就起哄。

呂先生話個裸男當時笑笑口，在場打機嘅人整蠱佢，叫佢擺吓甫士佢又照做，裸男話自己左邊手臂有個叮噹紋身，又話自己似蠟筆小新。呂先生懷疑佢可能有不良嗜好，過度興奮搞到自己都唔知自己做緊乜。

警察接到途人報案趕到機舖，將個男人帶入洗手間，等白車到場送佢去醫院檢查。警方話調查後相信事件唔涉及刑事成份，35歲嘅事主之後送院。警方將案列做發現懷疑精神紊亂人士處理。


上一則
上一則
爆相爆片：躁伯真情演繹　港鐵冧檔之逼到癲