https://hk.lifestyle.appledaily.com/lifestyle/columnist/陳也/daily/article/20181019/20525040

明日大嶼，願景跑數 - 陳也


政府新聞處(互聯網)



港鐵四線齊冧的同一天，牛津詞典收入add oil這個港式英語。打工仔加油，點都唔夠港鐵加價快，返工焗坐港鐵但遇着四線聯瓜的時候，乘客的無力感爆棚，自然link埋去林鄭的明日大嶼。

唔使山竹的地獄試煉，只要鐵路一down，吹到火紅的明日大嶼，瞬間打回孤島原形。將軍澳居民是最強人辦，有人自稱行山一句鐘由將軍澳行出鯉魚門返工。頂硬上的自由行，丟那媽的下一代，今日開始必須為明日大嶼練定鐵打的腳骨。


明日大嶼燃燒市民怒火不夠一星期，林鄭就縮沙走數了，說爭論千七和一千公頃冇意義，先填交椅洲一千公頃再算。喔，明日大嶼，話咁快就變明日大話，比起老董當年金句「八萬五，唔再提，即係唔存在啦」更快斬纜。一千發水千七，大便論委員抱怨上錯賊船。

老千船長林鄭忽然又轉舵，做返細個餅，維持原創的一千。林鄭辯解「千七係願景，唔係藍圖」。縮得快，好世界，願景這回事，要睇阿爺面色，也要夾阿爺盤數，中美貿易戰在在需財的今日，林鄭口中「五六千億走唔甩」的明日大嶼流水賬，邊個監管得來？議員查數嗎？超越紅線喎。傳媒報道箇中內幕嗎？等住拉去槍斃！

陳也
電郵 :[email protected]


上一則
上一則
龔自珍詠史 (林道群)