上星期講剛病逝嘅微軟創辦人Paul Allen，即Bill Gates嘅早期拍檔，其中提到微軟帝國。朋友問，當年微軟係點解變成大奸角呢？

微軟嘅高峯係九十年代中，獨霸個人電腦成個餅咁滯，同Intel夾埋聯盟，兩間公司佔咗全球個人電腦生態圈嘅好大部份利潤。一個生態圈裏面，唔同嘅公司，攞到嘅收入係點分嘅呢？首先唔係平均分，亦都唔係按成本分而利潤均等。分幾多，取決於圈裏面嘅企位，企唔同格，利益可以差天共地，所以圈內都係貧富懸殊，而微軟做嘅係OS同係人都要用嘅文書處理，兩樣都有強大網絡效應，當然係食晒生態圈嘅大份利益。

但大還大，賺錢還賺錢，唔一定乞人憎。今日嘅蘋果夠大啦，大家都唔覺得係非常邪惡，當年微軟變大，形象都幾正面，行內對Bill Gates嘅尊崇，就算未去到Steve Jobs高峯，都唔係差非常之遠。Windows當打年代，基本上全世界做軟件嘅，都跟佢搵食，而大家確實係搵到食。今時今日手機年代，軟件商搵食都仲有iOS同Android兩家，當年就只有Windows，重要性可想而知。微軟深信，軟件商好，用戶就好，微軟更好，所以對軟件商投放嘅心力，隨時仲多過對個人用戶。

但跟住發生咗件事，大大改變咗之後嘅軌迹，就係互聯網出現。想像你係微軟，本來你係個人電腦嘅中心裏面嘅中心，全地球嘅軟件商都係圍住你而轉，你就負責不停升級個OS去用盡啲Intel不斷加快嘅運算，從而令軟件商有空間升級自己嘅軟件，於是用戶就升級部電腦，升級埋個OS，又升級埋啲軟件，升親級都係錢，成個行業跟微軟搵食，而冇軟件商可以繞過微軟，因為OS佢話事，佢就係唯一嘅平台。

忽然間，互聯網出現，打開咗個缺口。你睇一開始流行嘅網頁，好低B咁，核核突突，有啲字有啲圖有啲連結，冇乜咁把炮，最多第時咪畀你播埋片，唔通可以用網站嘅方法整個Photoshop出嚟咩。咦，問題嚟嘞，其實道理上係整到個Photoshop出嚟噃，而要克服嘅嘢，只係中短線時間問題，唔係可唔可能嘅問題。當Hotmail等等開始做到Outlook做嘅嘢，個趨勢唔難睇到。咁即係話，軟件唔再直接倚賴OS，而係個browser，咁即係可以繞過微軟？

互聯網軟件越成熟　微軟越難屈機
微軟意識到呢個缺口，純粹商業計算，只有兩大樣嘢要做：一，隊冧最多人用嘅browser，即係Netscape，捧自家製上位。二，上位後，阻礙互聯網嘅發展，拖到有咁慢得咁慢，最好永遠都發展唔到去可以整個Excel或Photoshop出嚟嘅階段。因為互聯網軟件越成熟，微軟屈機嘅方程式就越唔再有用。搏咗老命自保嘅微軟，兩三下手腳就完成第一步，用綑綁方法令IE成為第一，然後執行第二步，馬上解散IE團隊，成功拖互聯網後腿幾年。亦因為綑綁，引嚟美國政府反壟斷搞佢，而新一代嘅startups，擁抱無商業機構主宰嘅互聯網平台，就當然非常之唔鍾意微軟攪局，仲記得早期整網站，每次嘗試支援IE嘅時候，一定會不停爆粗，詛咒IE快啲釘蓋。

所以，微軟唔係因為變奸而衰，美國政府出唔出手未必好大分別，而係因為知道會衰，所以變奸。當然唔代表未來微軟唔會勁，只不過唔會好似以前咁有得靠網絡效應屈機賺取自然壟斷級嘅錢，而係要日日戰戰兢兢咁同Amazon同Google競爭，賺番啲相對溫和嘅利潤，而終於接受咗現實之後，就唔使再猛拖人後腳，形象改善番，就唔出奇了。

撰文：宋漢生

source : https://hk.lifestyle.appledaily.com/lifestyle/tech/daily/article/20181025/20529742
+++++++++++++++++++++++++++++++++++++++++++++++++++++++++++++++++
九十年代微軟直頭衰過贏國