上次講到，互聯網出現，有可能取替Windows，成為程式嘅平台，將作業系統隊低一格，令壟斷作業系統嘅Windows，影響力大打折扣。舉個例，當你唔再用微軟系嘅Outlook而改用Gmail，你就唔再咁關心Gmail底下嘅browser底下嘅OS係Mac定係Windows。微軟感受到龐大威脅，不惜被告濫用壟斷力量都要用綑綁IE去奪取Netscape嘅browser一哥地位，然後用IE嘅市場地位去拖互聯網嘅後腿。自此，喺新一代軟件開發人心目中，變成阻住地球轉嘅大奸角。

咁不過，拖得一時，唔拖得一世，大家見IE咁玩法，就開始有人走出嚟衝擊下佢嘅地位，再加上微軟俾政府告綑綁之後，都唔想再惹咁大麻煩，開始有其他browser慢慢爬上嚟，例如Firefox。最成功嘅係Google出嘅Chrome，最終做埋一哥。當年Google勁sell Chrome，你微軟用Windows綑綁，而Google係搜尋第一，大部份地球人每日都會上Google，上親嚟，如果唔用Chrome嘅，Google都不斷提你提到你轉會為止。

Google出重手搞browser，有人話係想取代微軟成為科技界龍頭，但仲有更實際嘅原因，就係Google發現咗條大財路，用搜尋賣廣告，變咗廣告公司，問題係，如果個browser熄咗廣告，咁Google就渣都冇得剩，呢個核彈掣，一日落喺IE微軟手中，一日Google都唔使旨意瞓得着覺，於是攻佔browser市場，就變成重中之重嘅策略任務。當一眾browser不斷推動互聯網發展，IE影響力越嚟越細，而且亦唔能夠將腳步再拖得太慢，後來除咗爛鬼政府網站，冇乜網站會大大聲話只支援IE咁反智。

去到呢度，個人電腦軟件嘅最大平台，果然變咗係冇商業機構獨霸嘅互聯網，你整個網上軟件放上去，唔使畀租，當然水電煤宣傳等另計，所以對好多人嚟講，互聯網終於發揮出潛力，好鬼烏托邦，終於將成個行業擺返去開放平台嘅正確軌道，以後都唔會再走返回頭路。

手機年代　iOS同Android雙霸格局
但結果係持續唔到幾年，因為手機彈咗出嚟。電腦市場，蘋果佔好細份，所以佢嘅Safari browser，都係佔好細份。點知手機爆紅，今次到蘋果上位，連帶Safari喺手機都紅埋。不過手機上邊個browser贏已經唔係咁重要，事關蘋果同Android都各自綑綁自家AppStore，要上到嘅格局架，個app唔可以係平時喺browser上行嘅軟件，而係專為iOS同Android而設嘅程式。即係話，兜咁大個圈，本來嘅Windows獨霸個人電腦，之後互聯網平台抬頭幾年，轉眼間進入手機年代，換咗iOS同Android雙霸。

當然互聯網軟件公司唔係冇爭過，最出名就係facebook一開始唔肯用iOS同Android官方指定技術，硬係要用比較近互聯網平台嘅方法，結果最終都係投降。連facebook有咁多資源搵其他出路嘅公司都舉白旗，其他公司陸續轉台就唔令人驚訝了，同時冒出寫所謂native app嘅新一代人才。iOS同Android雙霸嘅格局，睇嚟喺智能手機嘅框架裏面，應該都好難會點變，有趣嘅係，手機之後下一個係乜嘢嘅新空間？facebook重注落VR，但更多人憧憬語音操控嘅家居電器，引嚟Amazon、Apple、Google、facebook押注，呢四間邊個似會跑出，有機會再講。

撰文：宋漢生

source : https://hk.lifestyle.appledaily.com/lifestyle/tech/daily/article/20181101/20535154
+++++++++++++++++++++++++++++++++++++++++++++++++++++++++++++++++
今曬啦，各有各做