武俠泰斗金庸同美漫巨人Stan Lee先後離世，對東西流行文化兼修嘅毒L無疑係雙重打擊。

假如英雄美漫同武俠小說係兩生花，金庸同美Stan Lee可能係地球兩邊嘅雙生兒，各自喺平行宇宙獨當一面，亦無出其右。

撇除荷里活電影嘅現代詮釋，傳統超級英雄同江湖俠士確實有唔少相似之處: 唔隸屬政府又唔受監管，但有咩冬瓜豆腐政府又識得搵佢哋救命；日日行俠仗義又唔使返工，完全唔明呢班人點樣出糧；打交整爛人地方天經地義，至多放低幾舊銀兩了事 （鬼佬英雄甚至銀兩都慳番） ……

無獨有偶，Stan Lee同金庸創作生涯亦差不多同期起飛：金庸1955年首次連載小說《書劍恩仇錄》；Stan Lee雖則1939年加入Timely Comics （Marvel前身），二戰期間開始為《美國隊長》等漫畫擔任編輯，但要到1961年嘅《神奇四俠》佢先真正為美漫帶嚟革命，同《書劍》首載只係六年之差。

「做漫畫曾覺羞家」
更巧合係，兩位巨匠獻身流行文化之前，其實都志不在此。眾所周知，年輕時嘅金庸一心想做外交家；至於16歲就去Timely撈編輯嘅Stan，當年理想係寫一部「偉大嘅美國小說」。當然，其時美國剛剛從經濟大蕭條恢復，一個中學畢業生能夠搵到份嘢做，已經值得還神。

聽番啲前輩講，金庸執筆初期，文人雅士普遍視武俠小說為低俗娛樂，難登大雅之堂。另一邊廂，漫畫喺3、40年代美國直頭係細蚊仔讀物，完全唔見得人 (雖然《美國隊長》曾經陪伴美軍渡過二戰歲月)； 其時Stanley Martin Lieber不惜化名「Stan Lee」，就係為免親朋戚友識穿自己做漫畫編輯。

「金庸有錢過Stan Lee？」
論名氣，論成就，Stan同金庸大概不相伯仲。若論筆下英雄創造嘅巨大財富，Stan Lee或者仲稍勝一籌 --- 單單係「Marvel Cinematic Universe」20部電影票房就高達530億港元，仲未計《X-Men》、《Deadpool》等非「MCU」出品，以及多年嚟無數動漫作品。之不過，90年代打後Stan其實經已卸任Marvel總編輯，即使2000年代佢轉戰荷里活推動Marvel電影，最終分紅亦遠比大眾想像中少，畢生資產唔超過6.2億。至於金庸，外界估計資產總值有幾十億。

「開創有血有肉美漫」
若論作品內涵，Stan Lee更加輸金庸幾條街。

唔係話佢老人家冇料到，只係Stan Lee出道嘅年代美漫仍處於成長期，故事普遍淺薄，編劇實在難有發揮。不過Stan值錢之處，正係能夠喺框框裡頭變出新意思。1961年，佢始創嘅《Fantastic Four》（神奇四俠） 一鳴驚人：讀者首次喺漫畫睇到超級英雄有軟弱一面! 其時業界龍頭「DC」旗下角色往往係正能量悶蛋，個性平面老土；反觀四位奇俠，有被家庭事業拉扯嘅橡皮人，有被老公當透明嘅隱形女，有對外形自卑嘅大舊衰，又有周圍點火頭嘅半熟少年……而且四人長期水溝油，一邊收拾壞蛋一邊都要不停鬥嘴。依家聽起嚟或者冇乜特別，但對當年讀者嚟講，呢啲有血有肉嘅人物簡直耳目一新，亦讓大家終於有機會喺漫畫書見番自己。

貼地，成為60年代Marvel殺出嘅新血路。充滿青春期焦慮嘅蜘蛛俠、似乎有鬱躁症嘅變型俠醫……Stan Lee愈係為英雄設計性格缺憾，觀眾就愈覺得親切。後來Stan Lee進一步走入讀者嘅世界，將時人面對嘅社會動盪都寫入故事：《X-men》裡頭嘅Professor X根本就係馬丁路德金，主張與人類武鬥嘅磁力王就係黑人領袖Malcom X……成個變種特攻嘅世界觀其實就係Stan Lee從人道立場出發，對黑人民權運動嘅良心呼應。至於佢有份創造嘅黑人英雄《Black Panther》，更成為業界先鋒，讓黑人讀者喺漫畫搵番身份認同。

即使冇金庸小說嘅文史哲修為，喺回應時代方面Stan Lee可能走得更前。可能因為咁，Marvel喺60至70年開始吸納知識水平高嘅新讀者，包括一代又一代大學生，同意大利名導費里尼。巡迴高上學府分享Marvel創作秘方，亦成為Stan Lee樂此不疲嘅公關優差。

「假假地，但好心地」
若問金庸同Stan Lee最大分別，我會毫不猶疑地答: 我唔會特別想喺銀幕上睇到查大俠，但我唔介意睇多幾次Stan Lee。

事實上，比起寶山一樣嘅豐富創作，Stan Lee天生嘅表演才能對Marvel貢獻更大。由佢執筆嘅書後專欄，到佢發起嘅讀者俱樂部「Merry Marvel Marching Society」，再到無數媒體訪問同影視演出……佢略帶浮誇嘅形象總有辦法引人注意；左一句「True Believer」、右一句「Excelsior」，佢啲口頭襌有令人high high地嘅感染能力，而且你會覺得佢一心受埋你玩。

大師仙遊，網民紛紛分享佢眾多電影客串片段哀悼。當中我最鍾意下面《Mallrats》呢段：假假地，又真真地，擺明做戲，不過又幾好心地。 https://bit.ly/2DkPejf

撰文：阿雞
《蘋果動新聞》前創作總監，文化雜食者，high嘢cheap嘢都啱，淨係冇中間。現為網台Booom主持cult片節目《百老匯電椅中心》，並負責附屬FB群組《百老匯電椅中心:放棄治療部》（broadwayelectricchair）

source : https://hk.lifestyle.appledaily.com/lifestyle/realtime/article/20181116/58917456
+++++++++++++++++++++++++++++++++++++++++++++++++++++++++++++++++
其實勁