https://video.appledaily.com.hk/mcp/encode/2018/11/19/3733854/20181119_ccm_08_v1_w.mp4

蘭桂坊有兩個男人懷疑醉酒打架，上演街頭擂台。讀者李先生早幾日喺蘭桂坊消遣時，發現有一個西裝男同一個黑衣男猶如拳手，喺一條後巷地上扭作一團大打出手。其間另有一個男人好似裁判咁上前調停，但兩位拳手打得相當忘我，互有攻守，難分難解，引來大批市民圍觀，仲有女觀眾睇到手舞足蹈，好似擂台打氣女郎。

兩位拳手分別係西裝男同黑衣男，片段一開始就見到黑衣男首先嚟個「納爾遜式鎖」，將西裝男背摔到地上，可惜力度欠奉，未能將西裝男摔低，自己仲瞓咗喺地面，畀西裝男有機可乘，一個轉身使出連環右勾拳，更一手扯住黑衣男，諗住迫使佢屈服。

呢個時候另一個男人上前介入，猶如裁判咁，彎身查探黑衣男情況，好似中場休息咁。呢場臨時上演嘅街頭擂台吸引大批市民圍觀，有一個女觀眾仲一邊睇一邊跳舞，猶如擂台打氣女郎。
無幾耐黑衣男睇準機會，左手亂掌狂抓西裝男塊面，再雙腳撐牆借力鬆開對方，翻身半跪、雙手各捉住西裝男雙腳諗住反撲，下半場亦正式開戰，西裝男雙腳被捉，馬上亂跳企圖擺脫，但黑衣男緊捉未有放手，一失平衡雙方又再次跌到地面，西裝男順勢使出「霹靂追魂鎖」，坐起身左手緊箍黑衣男條頸，右手再次使連環拳，狂毆黑衣男個頭，令佢幾乎無還擊之力。

黑衣男盡地一擊，全力推西裝男，最終都制服唔到西裝男，即使奮力掙扎都唔成功，戰況先略為靜止。裁判見呢個情況再次介入，着令拳手「Let it go」，當中有拳手指有人阻頭阻勢仲侮辱人，所以情況未能制止，裁判惟有最後兩手一揮，就好似宣佈打和。




兩男喺地上糾纏，遠處仲有「打氣女郎」扭身扭勢，跳起打氣。

source : https://hk.news.appledaily.com/breaking/realtime/article/20181119/58934234
+++++++++++++++++++++++++++++++++++++++++++++++++++++++++++++++++
好勇武