上星期講Basecamp本新書，過兩日Basecamp創辦人，寫公開信批評Amazon嘅Jeff Bezos。當然有可能係為谷新書，但都係唔尋常，事關Jeff Bezos係Basecamp唯一投資者。好多人以為Basecamp冇投資者，因為佢哋成日勸大家唔好當籌錢燒錢係成功嘅唯一路徑。其實Basecamp雖然年年賺錢，但都有拎Beff Bezos錢，係呢行少見但有趣嘅安排。

因為Basecamp年年賺錢派息，所以唔會咁老襯走去無端端多隻香爐多隻鬼，話說早年Jeff Bezos搵佢哋，係欣賞間公司，條件又好有彈性，自己錢自己話事，唔要求有董事局投票權，唔使發新股，又冇所謂退唔退到場，繼續係咁多嘞，唔使好似VC咁多多要求。結果Basecamp就當買個保險，賣一部份畀Jeff Bezos袋筆錢，以防第二日有乜不測，代價係股息要同Bezos分。結果，Basecamp創辦人有咗保險，而Bezos分得嘅股息一早超過咗佢畀嘅價錢。呢類安排，對於賺錢嘅startup其實好有用，不過好罕見，暫時未聽見過有其他例子。

總部二號　竟然宣佈雙冠軍
講返件事，Basecamp批評嘅，係Amazon HQ2嘅處理手法。事緣Amazon咁多年嚟，都係將總部設喺Seattle，當年揀Seattle，係因為喺多科技人才嘅城市嚟講，嗰個州係算少人口。網購銷售稅，如果買賣雙方喺唔同嘅州，就唔使畀。咁當然揀嘅州越少顧客，就越少顧客要畀銷售稅，而呢個着數，令好多人轉去網購。

到近年，網購風氣已成，Amazon亦已經開始拋離網上對手同埋網下對手，計條數，發覺開多幾個點對公司物流等等營運着數更大，於是兩年前宣佈開多一個總部，公開叫各城市政府入標。有一個總部，再開多一個的話，正常人係叫分部，不過話開分部，個氣勢冇咁強，吹大啲，叫做總部二號。都算嘞，點知上星期揭盅，竟然宣佈雙冠軍，兩個城市贏出，即係話，總部二號，都分開兩個，語言偽術高到大家睇唔過眼。

最影響觀感嘅，係成過競投過程裏面Amazon擺出嚟個款。Amazon文化，出咗名超重視顧客，而對供應商，畀人印象就係成日喺人哋身上輾過。係，Amazon揸住本計劃書，幾多萬個高技術職位等等，係好大粒糖，係好多市政府政客想成功爭取，叫佢哋競爭吓，比拼吓邊個城市出嘅優惠多啲，好正常。問題係，佢成件事嘅嘴臉，都令人覺得各個城市，喺Amazon眼中，只不過係just another供應商。嘴臉衰當然唔犯法，不過乞人憎。

睇唔順眼　憎恨度直逼銀行
公司嘅文化，係由成功經驗越整越實，好難改，但以往成功嘅文化去到另一個範圍可以係障礙。Jeff Bezos唔係蠢到唔知要做好啲形象，前幾年開始喺呢方面做啲畀人睇到嘅嘢，但係一單HQ2，又倒後行返三步。你睇幾大科技巨擘話事人，Google兩個創辦人明顯唔鍾意拋頭露面，facebook Zuckerberg成日俾人話似機械人，上一代嘅Bill Gates形象更加係高高在上寸寸貢，相比之下，Steve Jobs當年係最似返個人嗰一個。

大眾對科技公司越睇越唔順眼，好快會超越對銀行佬嘅憎恨，而Trump已經不下一次開口抦Amazon。係，今次將啲職位分畀兩個城市，係準確地購買咗兩黨唔少政治分數，但如果Amazon再咁樣食相難睇，俾人搞只會係遲早問題。

撰文：宋漢生

source : https://hk.lifestyle.appledaily.com/lifestyle/realtime/article/20181122/58937643
+++++++++++++++++++++++++++++++++++++++++++++++++++++++++++++++++
比呃錢