(美聯社圖片)

虛擬貨幣比特幣(Bitcoin)呢幾日暴跌，周三曾經失守4,200美元關口，即係低過「掘礦」成本，搞到內地爆發「礦難」，成班礦工竟然齊齊搬走部礦機，當廢鐵「斷斤秤」轉售止蝕。點估到虛擬貨幣一哥會應驗咗「一剎那光輝唔係永恒」!

話說比特幣早係一星期前仲維持6,000美元以上水平，但後來一直急跌。根據CryptoCompare數據顯示，周三仲要最低跌到4,142美元，一星期內累跌逾三成。雖然晚上7點半跌幅已收窄至4,584美元，按日升番4.31%，見都「嚇到個心都離一離」!

望住自己啲資產突然蒸發，難怪成班內地礦工掀起一場「賣鐵潮」，部分小型比特幣礦場嘅「廢棄礦機」已經堆積成山，再用回收廢鐵嘅價錢斷斤秤嚟賣。有內地網民形容，今次貶值潮令比特幣再次於財經界「大放異彩」，亦有網民透露有八成資產已經人間蒸發，宣布「破產」。

但係今次比特幣暴跌，反而益咗俗稱「穩定幣」嘅泰達幣(USDT)，因為佢嘅價格與黃金同埋美元掛鈎，市場急急腳搵避險貨幣止蝕，令泰達幣單日交易量較月初突然暴漲1.5倍至50億美元水平。市場亦隨即傳出美國司法部已經展開調查，懷疑比特幣同埋泰達幣，存在不尋常價格波動，可能涉及操縱問題。

來源 source: http://hk.on.cc

+++++++++++++++++++++++++++++++++++++++++++++++++++++++++++++++++

點解唔平賣