https://video.appledaily.com.hk/mcp/encode/2018/11/22/3735286/20181122_ccm_03v1_w.mp4

周三晚8點幾旺角塘尾道天橋突然有好多人聚集圍觀，有個外籍人士仲俾多人截住唔准走，究竟發生咩事呢？原來有人懷疑手多多，涉嫌非禮一名女途人，其他熱心途人經過見到，於是就幫手捉住個色狼，之後將個色狼交咗畀趕到嘅警員，帶返警署調查。

目擊市民黃先生當時經過天橋，佢拍低咗相片，片中可以見到一個着藍色外套嘅外籍男子，俾最少6、7人捉住，其間個外籍男子不斷掙扎想走，但結果梗係走唔甩啦。

其中一位着紅衫嘅正義哥睇唔過眼有人涉嫌非禮，就叫其他幫手捉人嘅市民捉實啲，話個色狼好大力，仲爆粗鬧爆個色狼：「非禮？！」，表現得相當勞氣。不過個色狼係講英文㗎嘛，似乎就唔明對方粗口有幾勁囉。

現場被人非禮嘅女事主好激動，喺度大嗌之餘仲喊添，正義哥就不斷同佢講：「你冷靜啲先，冷靜啲先．．．你唔使驚㗎。」有其他女途人亦喺受害人身邊不停安慰。案發之後，警員接報好快就到場處理。

警方表示，周三晚8時許，在旺角亞皆老街與新填地街交界 發生一宗懷疑非禮案件，35歲女事主尾隨追截並準備用手機報警期間，手機遭涉案外籍男子搶走拋落地下砸毀，兩人在亞皆老街與塘尾道交界一條天橋上發生糾纏，女事主被推跌地上，途人見狀合力將男子制服，警員接報到場調查，將涉案46歲持香港身份證的意大利男子拘捕，兩人分別受傷及不適，一併由救護員送院治理。

警方經初步調查後，列涉嫌非禮、襲擊致造成實際身體傷害及刑事毀壞處理，案件交由旺角警區刑事調查隊跟進調查。


涉案意大利男子被捕。


見義勇為市民協助調查。

source : https://hk.news.appledaily.com/breaking/realtime/article/20181122/58942737
+++++++++++++++++++++++++++++++++++++++++++++++++++++++++++++++++
好野