https://video.appledaily.com.hk/mcp/encode/2018/11/23/3736321/20181126_sub535newnew_clean_w.mp4

如Kickstarter等眾籌網上面有好多意念創新的產品，但大家支持時都或多或少要有心理準備，因為隨時都可能中伏。Yashica去年10月在Kickstarter啟動了Y35 digiFilm數碼相機計劃，推出一部價錢只是千餘元的數碼菲林，特別之處是只要入不同功能的數碼菲林就有不同效果。雖然現時Yashica已不是以前的Yashica，亦不再是日本公司，但這部相機外形唔錯，有番以前Yashica菲林機的影子，加上意念創新，第一天集資額已超過500萬港元，最後埋單更超過1,000萬港元，有25個國家近7,000名Backers支持，回響相當大，而記者亦是其中一名Backer。

Yashica Y35 digiFilm成功集資後問題先出現，如曾沒有更新製作進度，沒有回答Backer的提問，亦大幅延遲派貨時間。出貨時間由最初預期的2018年4月延至同年9月，但寄出少量產品，及後又承諾10月內會出貨，而記者一直收唔到相機，不斷在網站留言催促亦無得到回應，最終要等到11月初才收到產品，好彩的是相機操作正常，而且數碼菲林數量齊全亦無異樣。但有些Backer收貨發現Y35 digiFilm數碼不能操作，黑白菲林會拍出藍色效果，數碼菲林數目唔夠，要求廠方退貨的聲音此起彼落。

網上更有Backer拍片拆機拍片，展示Y35 digiFilm用料何等差劣；記者真金白銀購買兼且幾經辛苦先能取得相機，所以唔會拆機拍片，大家有興趣可到網上搜尋，包保令大家大開眼界。從Y35 digiFilm相機的外觀去睇，好多細位都只是裝飾，但「成功」快門掣後是需要拉一拉回片桿先能夠拍攝下一張，扮足菲林相機。不過要「成功」按下快門並不容易，兩段式設計的快門手感奇差，正常按下時好易變成慢快門，令相片效果「鬆郁矇」。

記者一次過訂了200度、1600度、黑白、6x6及藍色數碼菲林，但問題是唔知點解藍色數碼菲林色調是青綠色，6x6正方度相片是偏黃，200度數碼菲林實情只有ISO 100，1600度數碼菲林更只有ISO 300，但加入大量模擬「顆粒」的雜訊，跟Yashica Y35 digiFilm最初宣傳時話拍攝效果「Unexpected」一樣，真係估佢唔到。記者最初用了$1,188訂購了相機連5枚數碼菲林，當然這個價錢好難會做到效果合理的數碼相機，相信唔少Backers都可能對「新Yashica」有過高期望，若將Y35 digiFilm當成一部玩具相機看待，心情應該會好過一點，至少無咁肉痛。

記者：布偉倫
攝影：伍慶泉


Yashica Y35 digiFilm集資大成功，但之後就出現了好多問題。


Yashica Y35 digiFilm遠看外形還不錯，但好多細位其實都只是裝飾。


Yashica Y35 digiFilm最特別是可安裝數碼菲林拍攝不同效果。


1600度數碼菲林其實只有ISO 300，但就加入大量雜訊模擬顆粒。


Yashica Y35 digiFilm藍色菲林實拍效果，色調是青綠色的。


黑白數碼相機拍攝質素是當中最可取的了。

source : https://hk.lifestyle.appledaily.com/lifestyle/realtime/article/20181126/58940812
+++++++++++++++++++++++++++++++++++++++++++++++++++++++++++++++++
有貨重想點