https://hk.lifestyle.appledaily.com/lifestyle/columnist/左丁山/daily/article/20181202/20558991

陸客將重臨台灣 - 左丁山


韓國瑜



公子L頻頻去台北聽音樂會，左丁山上日見到佢，懶醒咁話畀佢聽，十一月二十五日「明報」有一篇長文介紹最新之高雄衛武營音樂廳，設計一流，音響質素超好，連柏林愛樂團都去衛武營演出（唔嚟香港）；文章作者亞然，係倫敦東方非洲學院博士候選人。藍營公子L都係微笑，話：「不便置評。」咦，似乎唔同意亞然嘅讚賞喎，追問下去，公子L答：「只能咁講，我有幾位朋友慕名去過高雄衛武營，佢哋一致嘅評語係台北國家劇院音樂質素最高，台中劇院次之，衛武營有所不及，只係得個靚字，所以去台灣聽音樂，台北永遠係首選，無謂走到落高雄。其實高雄市音樂水平唔算高，台中已經倚賴台北人顧客，高雄唔知靠乜。」

咁講法，衛武營可能係以前陳菊嘅形象工程，政治意味高過文化意味，現在呢個攤子要留番畀新市長韓國瑜去處理嘞，呢位政治人物嘅口才認真犀利，睇中天電視之選舉直播，不禁覺得香港政界人物好似唔識乜嘢叫做演講，口才輸晒。台灣傳媒稱韓國瑜一人救全黨（國民黨），今次選舉國民黨敗部復活，掌握15縣市政權，大利2020年之總統選舉。民進黨今次大敗，上下似乎慌作一團，全無領軍之才，下次再由蔡英文出選嘅話，明顯處於弱勢，但國民黨中生代還有甚麼好人才呢？同樣未見到。

韓國瑜創造之韓流，聲言以後打拼經濟，讓人民生活過得更好，於蔡英文政府無能情況下，聽來十分動耳，但說易行難，韓國瑜上台後，有何辦法振興高雄之「又窮又老市況」？左丁山於1980年代去高雄搞貸款，對象是船廠碼頭營運商，化工廠，出口特區內之工廠等等，而今全部不復當年勇，不知靠乜食糊。搞科技講創新是遠水難救近火，點樣好？公子L話：「我最近好多時去台北，台中，夠清靜、物價平，市民有禮貌，的士司機夠客氣，繁忙時間在台北搭地鐵唔覺得人逼人，令我愛上台灣。」唉，有錢去台北及其他台灣地方旅行，現在梗係過癮啦，但繁忙上下班時間地鐵站唔多逼人，你話代表乜？假如金鐘站現在下午六時半嘅車站人流似上午七點，我就好驚咯。知道晒台灣選舉結果後，公子L叫大家快啲去台灣旅行，睇情況北京會係咁意幫吓手，容許多啲陸客去高雄，令市面繁忙，然後逐步加碼，令台北重現拖篋黨。加加埋埋至2020年，台灣旅遊餐飲業復甦，間接為國民黨拉票打經濟牌。這個可能性幾難抹殺，港客去台灣要趁早。

左丁山
電郵 :[email protected]

上一則
上一則
都是這老頭累事 (陶傑)

下一則
下一則
大海和小池塘 (古德明)