https://hk.finance.appledaily.com/finance/daily/article/20190106/20585057

2019年01月06日

摸魚手札：精密的榴槤樹投資局 - 渾水


一班榴槤友在榴槤局上品嘗榴槤，冷不防有條友推銷「有投資價值」的榴槤樹，通常都會落搭的。


朋友傳來一個近期流行、設計高明的投資局。我聽完拍掌叫好，能夠這樣度條橋去cap錢，把榴槤樹證券化，背後精密程度比那些加密貨幣騙局好多多聲。

利益申報我不是榴槤愛好者，也不懂榴槤產業運作，只講背後的金融原理，當係一個學術研究。

首先投資局要有一班客推銷，對像就是一班榴槤終極愛好者或投機者。榴槤終極愛好者對榴槤品種都有研究，甚麼馬來西亞貓山王之類，能夠花時間栽種品味，提高自己對食嘅要求，通常都有點閒錢。

一班榴槤友在榴槤局上品嘗榴槤，齒頰留香，食得滋味，然後冷不防有條友向你推銷「有投資價值」的榴槤樹，通常都會落搭的，那是出於榴槤友對榴槤先入為主的偏愛。香港的氣候土壤唔適合種榴槤樹，所以榴槤樹一定是海外的，是但吧，就大灣區或馬來西亞吧。所以，一班榴槤友就被推銷買海外的榴槤樹了。

投資品要講回報，講yield，當榴槤樹被包裝成投資品，都離不開這個法則。加密貨幣挖礦大致分兩種，一種是買算力合約，即係你好像以前封建制度「佃農」般買一個回報分成權，挖機擁有權不屬於你，性質上似年金，然後推銷員收你管理費和營運費之類；另一種是買斷挖機和算力，乾手淨腳。榴槤樹投資品的設計都大同小異，技術上你可以買斷一棵樹回家的，但基於香港的氣候和唔知點樣處理，通常都無人會買斷一棵樹回家自己種。

所以，榴槤友會選擇向中介買一個榴槤證券，本質上就係海外榴槤樹的擁有權，然後合約講明中介負責管理，將榴槤嘅果實摘落嚟賣出去之類。

榴槤都有旺季淡季，回報除咗講錢之外，賣不出去的榴槤會送給你，當然空運榴槤是有成本，這兒中介當然要收多你一筆。於榴槤友眼中，即使榴槤賣不出去，佢哋都唔會太介意，因為佢哋覺得自己種樹自己食，呢啲都係出於對榴槤先入為主嘅偏愛，所以最後回報冇錢剩、得榴槤，佢哋都係會落搭。

這班榴槤樹中介很聰明，捉到榴槤友的心理盲點，他們不是追求金錢上的yield，而是可以食榴槤心理上的yield。而且海外投資往往有先天上嘅麻煩，呢一點佢哋都捉得到，所以可以巧立很多名目去收服務費、管理費、顧問費。

如果唔想成個投資局睇起上嚟好似龐氏騙局，中介尚有一絲人性的話，可以安排帶一班投資者去果園「參觀」一下。否則那些榴槤樹是否真實存在，都已經不太重要了。

渾水
投資人
http://fb.com/muddydirtywater



上一則
上一則
趣BLOG BLOG：港股MPF必敗法 (股榮)

下一則
下一則
魑魅魍魎：紅資劍指環聯　意在銀公 (十一少