https://hk.lifestyle.appledaily.com/lifestyle/columnist/陳也/daily/article/20190321/20637617

謝師宴走樣 - 陳也


國泰人壽短片截圖(互聯網)



謝師宴去不去？睇怕要改廣告金句警告：俾得起，先好去！宴請老師唔係家家酒，係真酒店，盛惠每位980元！冇眼花，成張金牛。不出席者，350元，用來招待老師和饋贈紀念品予學校。

香港地，講金是日常，家長如果冇教仔女理財，此乃最佳時機，問吓同學，去有賺？抑或唔去，冇蝕得咁多？同學對謝師宴有懷疑，明顯與老師關係唔多河蟹，去飲宴實聽背脊骨落，不歡而散，加上舟車勞頓，隨時撞着港鐵四十年不遇的系統PK。這樣，倒不如俾三份一價，當做「斬倉」，止蝕離場。

老餅年代的謝師宴不是這樣的，既然師生關係已經走樣，同學「走數」無可厚非。勉強無幸福，校方發通告稱「中學畢業乃人生重要歷程之一，為使同學能與其共勉之學友一同分享這份溫馨的喜悅……」骨痹吧！同學不想回憶但未能忘記的是：被同學脫褲打屁股霸凌而倖存下來，last day被老師報警拉人封艇幸而沒有情緒不穩入精神科，同學跳樓自殺後校長副校「低調」冇影，老師連醫院也不肯去。而酒店謝師宴照搞，同學感受到溫馨喜悅與否都要埋單。中學畢業，寄望往後人生歷程中種種的業，一張金牛能夠化解就好。

陳也
電郵 :[email protected]

上一則
上一則
香水女郎 (古德明)

下一則
下一則
我們來做遊戲 (楊靜)