https://hk.lifestyle.appledaily.com/lifestyle/columnist/余家強/daily/article/20190329/20643755

【有限創意】金像獎真係應該唔搞 - 余家強


合成圖片(資料圖片)



香港金像獎發佈《如何面對沒有金像獎的日子》短片，大意先自嘲種種不善，戲言停辦，繼而群星誓死捍衛云云。先別說劇本之屎橋（竟然代表電影界），這種一哭二鬧三上吊姿態徒惹人反感──老子不幹啦，試看看無金像獎睇幾淒涼！唉，就快連沒有港產片的日子都適應，會唔捨得金像獎？一年一度花枝招展行紅地毯、高談吓藝術、互相吹捧，唔捨得的是業界而已。

我想講，金像獎的確應該停辦，怪它自己玩殘自己。早前，谷德昭導演在fb說：「今年幾齣攞獎呼聲高的都好難睇到……一日有一間戲院上映幾場，一早預售晒。」他當然可以免費去小圈子優先場，但坦言寧願與普羅觀眾同步呼吸。

原來，近年提名作品往往僅作少量公開播放，象徵式符合參賽要求，愈來愈似展銷會，多過似頒獎禮。谷導演厚道，解釋：「市道艱難，能夠在攞到獎後才挾聲勢上映，當然會有較好成績，完全明白。」他感慨玩法不同了。一句到尾，做壞規矩。我預先頒定個MVP給球員，等佢落場打真軍時格外起勁得唔得？欠認受性囉。

金像獎豈非全民投票嗎？別傻，從來不是，由專業評委說了算。以前市道好，業界未流行鑽漏洞，提名作品很多市民睇過，揭曉出來，公道自在人心。現在，遑論眾望所歸，賽前預測也談不上。街訪：「曾美慧孜會憑《三夫》攞影后嗎？」「乜上咗畫囉咩？」「秋生會憑《淪落人》攞影帝嗎？」「場數少到買唔到飛，不過秋生梗好戲啦。」訴諸「××梗好戲啦」猶如迷信名牌，不足為據。演員可能真正出色，亦非關觀眾不支持，是根本no say，有say亦不能影響結果，同特首跑馬仔無分別。

評委由過往獲獎者組成，今屆你評人下屆人評你，外界又未睇過，會否任意擺佈成俾面派對？筆者不懷疑專業眼光和操守，但「我話OK就OK」式作風，難怪香港沒民主。

MOVIE6搞全民票選、《蘋果動新聞》搞最港電影大獎，並非為金像獎造勢，恰恰相反，想討回觀眾話語權啊。

揶揄樂壇分豬肉，至少，事前和現場有首歌供聽清楚；金像獎呢，我們都是鄭少秋，唯有官晶華──靠十幾秒片段觀精華，得個知字。哪邊較具公信力？

所以，請咪再呻唔搞。激起公憤，弄假成真杯葛，就不妙了。

余家強
電郵 :[email protected]

上一則
上一則
笑到斷氣 (李純恩)

下一則
下一則
朋友屋企有鬼 (馮睎乾)