https://hk.lifestyle.appledaily.com/lifestyle/columnist/林夕/daily/article/20190403/20647459

玩IQ題輸給小朋友 - 林夕


資料圖片



在朋友家吃飯後，玩起IQ問答題。本來是一個五歲、一個八歲小孩子引發的，在旁邊想答案，比他們不只慢了三拍，不服氣，最後我竟然一把年紀，加入小孩行列，跟他們搶答。

第一條問：「企鵝為什麼只有胸前是白色的？」我一想到有民建聯中人說北極的企鵝，就想個方法解答順便嘲笑他們一番，當然慢了。答案是：「企鵝手短，只能清潔胸口那執毛。」

第二條問：「有人食咗個雞蛋，點解個雞蛋仲喺度嘅？」我又想，唓，剩低嗰個係大陸啲人造假蛋，幻覺嚟嘅啫呃我唔到嘅。然後又想，吃雞蛋那個人怕膽固醇高，於是只吃蛋白，個雞蛋咪連殼連黃剩返啲囉。想時遲，那時快，出題目的五歲小孩已經開估：「枱面本來就有兩個雞蛋囉，咁簡單。」

就係咁簡單，是我想太多了，好好迎接第三題吧：「有人讀咗個錯字，但係點解佢又冇讀錯到呢？」這回我搶答成功，因為佢讀嗰個就係個「錯」字。

好，下一題：「做錯咗乜嘢係想改也不能改嘅呢？」嘩，這一下子是我發揮時間，又走火入魔了：「係沙中綫工程、做錯嘢嗰個係林鄭、做錯嘢嗰度係立法會……」五歲與八歲小孩唔知我噏乜，跟大人一起笑，笑翻了天。答案好簡單，就係「交咗試卷之後就唔可以再改。」吹脹。

如果我姓賴，一定抵賴這是社會的錯，是社會這個大染缸啊，污染了我本來純潔簡單的思想。中段休息吃甜點時，想起「人的時間花在哪裏是看得見的」、「你吃什麼、看什麼，就變什麼」之類的話。像這類IQ題，考的其實是直覺反應，開發小孩本能性思考方式的確是很好的訓練。

像我這樣胡思亂想，覺得事情必然沒那麼簡單，一定有些蹺蹊，問題必然有些複雜，怎麼回得去小孩本來無「異」物的世界？

甜點後，問題又來了：「一艘船只能承載四十個人，否則就會下沈，現在有三十八個人在船上，有個孕婦上船，卻照樣下沈，為什麼？」孕婦恰我唔到嘅，胎兒不似大人重，所以，我就搶答：「孕婦是雙胞胎，不然就是三四胞胎。」

五歲小孩舉手說：「因為那是一艘潛水艇。」問我怕未？怕了。也不知我的思路屬於直線思考還是彎到無人能及，雖然輸得慘烈，但一家人能夠無拘無束沒大沒小玩在一塊，是我從沒經歷過的，唉，所以我咪IQ低囉。

林夕
電郵 :[email protected]

上一則
上一則
哥哥一眼鎖定隔空投情 (鄧達智)

下一則
下一則
可 惜 (李純恩)