早前世界衞生組織（WHO）係瑞士日內瓦舉行嘅第 72 屆世界衞生大會（WHA），正式將「打機成癮」（Gaming Disorder）正式列入為一種精神疾病，並且該標準將於 2022 年 1 月 1 日生效。對於呢樣野，我地香港人大都係一笑置之，反正總會有堆人認定「打機就係廢青」，加埋呢個標準都只不過令呢班人有多個借口而已。但係竟然忽略一件好重要嘅事，就係 SONY CEO 吉田憲一朗竟然表示會正視呢個問題兼採取相應措施！

根據外媒 Kyodo News 報導，吉田憲一郎早前接受聯合採訪時曾經表示：「我地將會嚴肅對待並採取相應措施。而且已經建立咗分級系統，將按年齡分級限制玩家，同時更會以我地嘅標准為基礎黎制定措施。」

最怕嘅係萬一佢地考慮根據年齡分級限制每日遊玩時間就大件事，大家可以參考返騰訊旗下手遊《王者榮耀》就曾經設定 12 歲以下玩家每日只可以玩一小時，成年者則 2 小時，過時後將被強制下線。正路 Sony 應該就唔會玩到咁大，但係呢樣野真係諗下都驚丫！

其實 Sony 早就已經根據暴力及性相關主題設立咗年齡分級系統，例如《Days Gone》就係 18+ 嘅作品。另外 PS4 上面亦到有家長控制功能，防止兒童過度沉迷打機。但係現時業界普遍反對世衛今次嘅決定，例如美國娛樂軟體協會「ESA」就回應話世衛只係單方面地強調過份沉迷遊戲而造成健康問題，但係就忽略咗遊戲所帶黎嘅樂趣，尤其係對職業電競選手不公，因為係好多地方佢地已經同一般運動員無乜分別。

睇返世衛定義，「打機成癮」有以下三種病徵，包含：「對於打機頻率、強度、時間長度等欠缺自制力」、「打機重要性凌駕於日常興趣及生活之上」、「即使面對負面後果仍持續甚至投入更多時間打機」，以上徵狀持續一年以上即可被認定罹患「打機成癮症」。

老實講，對於呢種說法好難認同，其實上面打機二個字換做其他字睇落同樣合理，例如「抖音」、「減肥」、「追韓劇」等等，咁又係咪要逐個 Item 幫佢開返個症呢？其實大部份玩家打機都係求開心又或者係放工放學 Relax 下，真正上癮到吸毒咁款嘅又有幾多？當然任何野過度沉迷始終唔係好事，但係大家都係成年人，我諗唔需要世衛出黎教大家點做人，同時都希望 Sony 高抬貴手，我仲想煲機架！

News from vjgamer
https://www.vjgamer.com.hk/articles/2019/05/27/55413/gaming-disorder

乜都係病，地球人好多病痛...