https://hk.news.appledaily.com/local/daily/article/20190531/20692181

隔牆有耳：優先場爆滿 觀眾落淚
《六四被忘錄》上映公義 - 李八方


《六四被忘錄》噚晚優先場全院滿座。


由《蘋果》主辦嘅《六四被忘錄》短片噚晚喺長沙灣一個小型劇場放映優先場，全院滿座，100個觀眾睇到拍晒手。片中穿插唔少新聞或歷史片段，包括解放軍喺天安門廣場血腥鎮壓學生嘅實況，唔少人睇到眼濕濕。

當年係後生仔嘅觀眾劉先生激讚短片充份反映咗紀念六四嘅困難同其背後意義。六四事件令佢明白乜嘢係公義，即使近年越來越多人對紀念六四乃至爭取民主感到無力，佢仍會繼續紀念。


當播出89天安門廣場鎮壓學生片段時，有觀眾睇到眼濕濕。


金像獎導演歐文傑監製《六四被忘錄》，噚晚亦現身優先場。


雨傘紀錄片導演陳梓桓：政治覺醒

拍攝得獎雨傘運動紀錄片《亂世備忘》嘅導演陳梓桓喺分享會上話，六四當年佢只有兩歲，但大個之後了解呢次中國最大型民主運動，成為佢「政治覺醒」開端。佢覺得港人爭取民主上付出嘅代價，同當年北京學生相比只係蚊髀同牛髀，所以大家唔應該放棄，「遊行、集會未必有實質效果，但起碼我哋反抗時，知道唔係好孤單。」

《六四被忘錄》由金像獎導演歐文傑監製，王宗堯主演。短片將於6月2日舉行正式首映禮，《蘋果》噚晚起加開五場優先場，同場加映諾貝爾和平獎得主劉曉波08年底被捕前最後訪問片段。

李八方



上一則
上一則
江湖滾熱辣 (馬龍)

下一則
下一則
隔牆有耳：盧比奧寸爆《大公》 (李八方)