https://hk.news.appledaily.com/local/daily/article/20190603/20694377


隔牆有耳：
六四館《香港電視》致哀版被盜 - 李八方


八九六四後出版嘅《香港電視》，以全黑封面向死難者致哀；紀念館收藏嘅版本卻遭人盜去。游大東fb圖片


聽日就係六四事件30周年，呢幾日六四紀念館人頭湧湧，支聯會秘書李卓人同八方講，單係呢兩日假期，平均每日有逾200人去六四紀念館，由開館到噚日，已有3,314人去過紀念館，但最令阿人意外係，唔少內地人專誠去紀念館，好似佢噚日喺紀念館遇到一名內地客，對方仲認得佢，阿人奇怪乜內地唔係封晒所有六四嘢？點解佢識路去新嘅六四館？點知內地客話佢一直有翻牆，所以好清楚六四事件，仲話內地邊有咁易將六四事件嘅資訊封到滴水不漏。

不過六四紀念館開咗冇耐，就有啲唔開心嘅事發生，影視評論人游大東日前喺fb發文，話原本想去紀念館睇返當年嘅《香港電視》，嗰期就係悼念六四做封面，點知去到有義工同佢講，本《香港電視》竟然俾人偷咗！阿人話紀念館入面有當年六四嘅報刊雜誌畀參觀人士睇，原意係令市民可以感受到當年港人對六四嘅感受，冇諗過俾人偷走，佢希望有關人士可以將雜誌送回紀念館，唔好令其他市民冇機會睇到呢啲珍貴歷史紀錄。



上一則
上一則
隔牆有耳：小店義賣捐眾新聞 食碗麵 撐新聞自由 (李八方)