https://hk.lifestyle.appledaily.com/lifestyle/columnist/左丁山/daily/article/20190628/20714723

新加坡歡迎你 - 左丁山


資料圖片



肥佬黎上星期再在佢嘅專欄講，花旗銀行私人銀行部已有客戶轉錢去新加坡，數以億美元計，之前外電也有報道……一名花旗客戶將一億美元轉去新加坡。

左丁山生性八卦，也去打聽吓，除咗金融時報講新加坡好想香港通過送中條例，坐收利益之外，原來亦有主動出擊，向中產投資移民開綠燈，不過為了費事得失北京，一於低調，故此新加坡資本嘅銀行一於悶聲發財，只係通知私人銀行部客戶，有「投資移民理財產品」出售，名額有限咁講，有一位中產朋友間接聽到消息，飛身去買，但已被告知：「Sorry，名額有限，只限本銀行客戶申請。再者，今期配額已經賣晒。」又有一間新資銀行密密替客戶提供選項，存款booked在本港還是新加坡，結果選後者佔多數。

新加坡與香港爭存款，爭金融生意，非今日始，早在1960年代，亞洲製造貨品輸往美國開始興旺，亞洲商人收到不少美金貨款，唔想回流返本國（那時候有不少外匯管制）想存款海外，但美國境內要抽稅，匯去倫敦當「歐洲美元」又遠一啲，故此新加坡吼準機會，於1968年設立Asian Currency Units（簡稱ACU），迎合在新加坡營運之本土及外資銀行吸收外匯存款，存美元稱之為「亞洲美元」（Asian Dollar）與歐洲美元（Euro Dollar）競爭，存英鎊則稱之為亞洲英鎊。點解亞洲美元唔嚟香港呢？皆因財政司夏鼎基當年唔捨得撤銷利息稅，白白失咗機會，到了1970年初，新加坡成為亞洲之中心已成氣候，夏鼎基知道唔撤利息稅，香港銀行輸得更慘，但一路拖延至1982年2月香港先至正式撤消外幣存款利息稅，1983年10月取消港幣存款利息稅，當時ACU已廣為國際接受，新加坡亦因此而成為亞洲金融中心之一，可與香港爭一日長短。

歷史顯示，新加坡極留意香港有乜風吹草動可以有利新加坡，過往1980年代末期之香港移民潮興起，新加坡也曾對香港人大開方便之門，乘機吸納香港人才及錢財，今次藉林鄭月娥無視世界大勢，中美貿易談判之微妙局勢，用蠻力試圖通過送中條例，搞到香港社會撕裂，商人震驚，正中新加坡下懷，新加坡政府視之為天賜良機，林鄭self-destruct，正也！新加坡之得，自不然係香港之失，這個政府多的是functional illiterate，連行政會議內之有經驗人士，都冇發揮到諫官作用，香港人有乜好講！可嘆者，不少建制派還是執迷不悟，大力在社交網絡及YouTube發佈「反擊」訊息，仲以為係愛國愛黨行為，何其執迷不悔也。

左丁山
電郵 :[email protected]

上一則
上一則
誤用白皮豬？ (陶傑)

下一則
下一則
【有限創意】現代版「二桃殺三士」 (余家強)