https://hk.lifestyle.appledaily.com/lifestyle/columnist/邁克/daily/article/20190716/20729969

紙包不住火 - 邁克


《觸目驚心》(互聯網)



《上流寄生族》導演發出的請勿劇透呼籲，不知道有沒有像《復仇者聯盟4：終局之戰》那樣設定使用期限，到時到候不再阻止觀眾攤開情節嚟講。其實在訊息四通八達的網絡時代，就算身處極權國度也能諗計仔翻牆，企圖封口封喉難若登天，紙不但包不住火，頃刻之間還可燎原，順應有頭有面的電影製作人要求三緘其口，唔係買佢哋怕，只不過唔介意陪佢哋一齊癲。尤其是幾十條線搭來搭去的《終局之戰》，貨如輪轉的人物壽終正寢都隨時有本事番生，慢吓手仲要生猛過前世，真係有佢咁多口水冇佢咁蠱惑，劇透考功夫過分析《紅樓夢》裏上下人等的利益輸送。真相大白仍然唔准人提，就像隻揪哥個人資料已經街知巷聞，除了惹人暇思的外號「香蕉糖」如何育成尚未揭曉，連住址都不是秘密，盲目偏幫自己人的警方還要浪費人力資源拆牆，太唔化了。

電影人那麼在乎劇透，無非不想流失觀眾，我因為沒有追故事習慣，從來不覺得預先知道後事如何有剝削樂趣之弊。影史上最精通宣傳術的希治閣，六零年推廣《觸目驚心》就來個背道而馳，同行慌死結局事先張揚，他要你準時入場，當年香港日報廣告嚴正聲明：「緊張大師希治閣通告舉世電影觀眾，不論身份如何高貴，在參觀《觸目驚心》時，必須於開場前入座，方能領略此劇之全部優點。」啊哈，第一場戲是什麼？是OL女主角趁午飯時間約壯男開波，遲到的話不但對後來的道德懲罰一頭霧水，也錯過那副引人垂涎的男體──飾演者John Gavin譯尊加溫，完全實至名歸。

邁克
電郵 :[email protected]

上一則
上一則
氣味問題 (李純恩)

下一則
下一則
他可以斟酌，你只可妥協 (古德明)