https://hk.lifestyle.appledaily.com/lifestyle/columnist/左丁山/daily/article/20190716/20729948

香港Be Water - 左丁山




上到陸羽飲茶，夥計竟然送上一封信，不禁嚇咗一跳，大概讀者唔識寄去《蘋果日報》，以為寄去中環陸羽更方便。陸羽夥計對此不以為奇，因佢哋不時都會收到信件，請陸羽代交畀熟客也。

呢位讀者鬧左丁山反對送中條例係為咗痛惜資產流往新加坡。佢話左丁山視香港人眼中只有錢，中國貪官，富豪巨賈之資金走人，有乜可惜喎！讀者W大概不太明白，香港自1842年以來，循環增長，不斷累積財富，至今成為世界前列富庶地方之一，靠嘅係乜嘢？香港一無資源，二無龐大內需市場，百多年來其實就係靠吃四方飯，正如今日青年人講Be Water，一向中門大開，靠天然良港「聚水」，尤其是中國人之水。1949年前靠與內地自由往來轉口貿易，1949年以後靠內地工商界南逃，帶來大量資金技術，成立輕工業（塑膠、假髮、電子、搪瓷、玩具）養活幾十萬工人（高峰期在1982之間有82萬製造業工人），1985年後，工業不斷北移，香港轉而倚靠貿易、旅遊、航運及金融，安然度過過渡期，成為服務業經濟（服務業佔今天GDP九成以上）。1997年之後，又變番1949年前模樣，因內地人口太多，百分之一人口係有錢人，已經有一千四百萬，兩倍香港人口，就似大笨象企在小貓旁邊，香港冇法子唔受大笨象影響，故此香港人靈活多變，似水流無形，更變動無聲，此局面之定海神針，令「水」不會四處竄流成禍嘅，就係英式普通法制度，有別於中國大陸之黨委行事，黨大於法，令四方分歧，故內地及亞洲區有錢人皆安心將「水頭」存在香港，幫助香港發達。

林鄭月娥無見識，行政會議中人又做yes madam，不加勸止，搞出送中條例大頭佛，害親香港。左丁山當然明白廣大市民及年輕人反送中，並非向錢看而係有歌唱，freedom and democracy，不過，一定要指出，送中條例動搖香港be water嘅本質，危害香港「聚水聚財」，其影響相當長期，為禍深遠。香港有識之士如大律師公會上街遊行並非與政府為敵，而係明白事理，醒目過林鄭、鄭若驊、李家超好多！唔好以為資金流走唔關我事，唔關你事，若外資不來，銀行不振，牽連甚廣，你我都冇啖好食。左丁山之反送中，一來不信任內地法律及法規，二來係明白送中條例危害香港根基。遊行影響市面生意係一時的，短暫的，林鄭破壞香港be water根基，禍及香港經濟，則是結構性大事！反送中講法治、民主，蘋果日報有大把評論員，唔駛多左丁山一個。

左丁山
電郵 :[email protected]

上一則
上一則
遊行派錢機制研究 (陶傑)

下一則
下一則
不如宣布戒嚴好了 (林夕)