究竟係港人創意無限定係苦中作樂？「反送中」方法層出不窮，網上嘅發聲行動令人「目不暇給」，估唔到連文化氣息都鼓動埋，仲令唔少人廢寢忘餐。

因乜解究突然咁好雅興？原來都係因為一個fb po激發。



話說有網民喺fb出po提供上聯：「一個警員兩個拳頭竟敢三番四次追著五六學生仲要七拳八腳再出九抓十分大膽」，

心水清嘅，一睇就知係星爺喺《唐伯虎點秋香》入面，同寧王參謀對穿祥鬥對聯嘅情節啦，用齊一至十嘅數目字做上聯講警察點執法，真係擲地有聲！

唔少網民當然大讚，仲用番谷德昭飾演嘅對穿祥口吻話：


如果各位讀者自問文學同時事修為夠高，不妨幫幫網友對埋呢句上聯：「示威中，民不暴，警不義，定性暴動可恥可恥。」﹙網民例句喺下面！﹚八方順手po埋星爺啲精警對聯畀各位參考下！
《唐伯虎點秋香》對聯

上聯：一鄉二里共三夫子，不識四書五經六義，竟敢教七八九子，十分大膽
下聯：十室九貧，湊得八兩七錢六分五毫四厘，尚且三心二意，一等下流
上聯：鶯鶯燕燕翠翠紅紅處處融融洽洽
下聯：雨雨風風花花葉葉年年暮暮朝朝
上聯：畫圖裡，龍不吟虎不嘯，小小書僮可笑可笑
下聯：棋盤裡，車無輪馬無韁，叫聲將軍提防提防
網民對聯

上聯：一個警員兩個拳頭，
竟敢三番四次追著五六學生，仲要七拳八腳再出九抓，十分大膽
下聯：十官九虧，加埋八公柒婆陸配五毛肆虐，由且三催二讀，一等無賴
上聯：柒柒婆婆媽媽日日躲躲戇戇XX
下聯：黑黑警警賊賊夜夜癲癲失失常常
上聯：示威中，民不暴，警不義，定性暴動可恥可恥
下聯：城市內，官無憑，兵無證，隨便鎮壓荒謬荒謬



「好公﹙工﹚整喎」。咁下聯點搞先至夠好？當然要絞絞腦汁，卒之有網民以林鄭為主題突圍而出：「十官九虧加埋八公柒婆陸配五毛肆虐由且三催二讀一等無賴」，

八方最欣賞「十分大膽」對「一等無賴」，個反差認真明確。

另一句上聯亦引起唔少人熱論，「柒柒婆婆媽媽日日躲躲戇戇XX」，林鄭近期攬警為要務，下聯當然最好以警察為主角，唔知「黑黑警警賊賊夜夜癲癲失失常常」呢一句，啱唔啱大家心水？




https://hk.news.appledaily.com/local/realtime/article/20190718/59837181?utm_campaign=hkad_social_hk.nextmedia&utm_medium=social&utm_source=facebook&utm_content=link_post&fbclid=IwAR0CEDcrM3Nmyw88Ta0vR0Y9n1z4cOH3RW9cgeAgFIXB-UUjtD0wgsacNSA