https://hk.finance.appledaily.com/finance/daily/article/20190730/20740123

【操盤手札記】官商最棹忌失信 - 割柑人


林鄭已經民望插水，隨時停牌。資料圖片


超過50日嘅連場示威，政府、警察，以至港鐵（066）、新地（016），盡皆失信於民！春秋時代，子貢向孔子問政，子曰：「足食，足兵，民信之矣。」再問不得已怎取捨，則曰先「去兵」，再「去食」，因為「民無信不立。」林鄭，你收到未？

除咗政界，投資界亦好講個信字，上市公司話派息又唔派，失信於股民，實冇運行！今年3月，中滔環保（1363）兩度拖延派息後更索性唔派，4月起停牌至今；舊年7月同前年7月，則分別有意馬（585）同品質（243）取消派特別息，股價插水。

林鄭已經民望插水，隨時停牌。要收拾爛攤子，首要重建市民信任，成立獨立調查委員會，係基本盤。對港股嚟講，相對本地政治因素，外圍因素影響更大，包括中美貿談、美國議息。

周二、周三，中美大佬派頭馬喺上海講數，市場期望唔大；與此同時，美國聯儲局議息，市場估計減息0.25厘，本港時間周四凌晨2時開估。周一，港股喺期指結算前夕收跌1%，恒指險守50天線，成交持續低迷，後市或回試250天線27600關口尋支持。

本地政治爭拗發酵，零售同旅遊相關股份首當其衝，繼而波及收租股、房託（REITs）、地產股。本地薑REITs，以規模計，依次為領展（823）、冠君（2778）、置富（778）、陽光（435）、富豪（1881）、泓富（808），都已由高位回調7%至14%。

不過，若減息周期展開，收息股有運行，包括REITs。睇周一表現，上述REITs跌幅介乎1%至4%，陽光、置富最硬淨。置富大股東係長實（1113），旗下商場主要服務本地居民，以必需消費品為主。該股預測息率5.1厘，若持續回落，可分注低吸。

割柑人
本欄逢周二刊出




上一則
上一則
【金手指】我至愛的金礦股 (孫柏文)

下一則
下一則
【佬訊專欄】黑色職安風遍地開花 (佬訊)