https://hk.news.appledaily.com/local/daily/article/20190828/20757454

隔牆有耳：TG鳴槍 速龍落場 黑旗亮相
渣馬狂想曲 - 李八方



國際長跑盛事渣打馬拉松2020將於明年2月9日舉行，大會已經係fb同網站出晒公告，通知想參加嘅市民，可以睇睇自己應該係8月、9月邊個時段報名，不過八方發現，噚日渣馬fb最多人睇唔係報名資訊，而係個po嘅留言，而啲留言講得最多唔係點報名，而係問當日有冇黑旗、有冇催淚彈、着唔着得黑衫，會唔會俾速龍追。


「攰到跪低會否被腳推開?」

有鑑於近日班差人執法尺度已去到接近冇尺度、亦睇唔到政府有乜方法阻止人示威，要班跑手參加咁大型又封路嘅長跑，自然擔心會唔會俾差人當「暴徒」、跑慢少少又話你非法集結，所以好多網民都預先問清楚，例如有人問「大型群眾活動！地鐵可能全綫封站？」又有人擔心「會唔會途經警署？好驚從內射tear gas喎，光頭蛇跑出嚟發難？」亦有人擔心報名後，有冇得轉其他組別，「請問報名後能否轉組，因暫時未能確定半年後會否被打到變傷健人士！」

亦有網民好關心今年大會安排，好似「大會鳴槍會用布袋彈定tg？」有人又問今年跑手係咪唔使號碼布跑，「係唔係唔使show編號，跑手可以無後顧之憂？」亦有人擔心安全問題「跑到攰，如果跪低，大會可否保證唔會有啲惡勢力人士用腳『推開』我？」「是否安全？會唔會有速龍叫我上行人路?之後屈我有攻擊性武器?會唔會俾警棍打?有冇人告非法集結?地鐵開唔開?會唔會有龍向上開槍?」更加有人話想跑快啲，會否安排速龍追跑手！八方怕明年嘅渣馬，要跑似乎要full gear上陣先得！


渣馬有趣留言

•請問「護旗手」係唔係冇時間限制？另外意外碰撞便衣警察參賽者（又沒有顯示委任證）會不會構成襲警？

•會否仿效以前澳門賽狗賽事有電兔俾賽狗狂追。當然參賽者是人，綁住幾件popo同速龍喺前面，我相信我跑得快過保特

•跑錯指定路線會唔會食警棍俾人除褲，我女友想跑但又好驚喎！

•可唔可以到時請白衫人喺後面揸鐵追我 我想跑快啲

•萬一跑得慢，會唔會俾警察射催淚彈？

資料來源：渣打香港馬拉松fb網頁


李八方



上一則
上一則
江湖滾熱辣 (尊子)

下一則
下一則
隔牆有耳：梁振英百萬懸紅搵笨 原來靠眾籌 (李八方)