https://hk.lifestyle.appledaily.com/lifestyle/columnist/%E5%B7%A6%E4%B8%81%E5%B1%B1/daily/article/20190902/20760142

打風遇上黑天娥 - 左丁山




政治氣候低迷，差不多每個周末皆有街頭大戰（818除外），令好多和理非人士遊行完畢就迅速回家，不遊行人士更多選擇在家過周末，於是食肆生意轉差，老友D係九龍一間高檔酒家常客，有VIP優惠咭，8月25日如常去去飲茶，埋單時，經理細細聲同佢講：「D先生，依家每日優惠VIP熟客，日日八折，請多啲幫襯！」可惜D先生平時在港島返工，到九龍吃午餐晚飯機會比較少，否則75元一客叉燒包，打個八折，今時今日在高價餐廳中甚有競爭力。

如此招數救市，記得係2003年先至見過。沙士高峰期，左丁山清楚記得某晚與左太放工後到灣仔福臨門吃晚飯，二樓全廳得兩枱客，就係左丁山與資深大狀鄧國楨，今年如果歷史重演，餐飲業都幾杰。左丁山得知名店有VIP八折之後，知道寫字樓在尖沙咀嘅廠家L有資格享受，話聲佢聽。廠家L在電話講：「我現在東莞工廠陪歐洲客睇廠，希望佢落單。諗起貿易戰，邊度有心機去名店食飯吖，特朗普再癲落去，我就要幫襯大家樂！」

咁又係，中國在8月23日宣佈還擊，向總值750億美元美國商品加徵5%至10%關稅，自9月1日及12月15日起實施，對美國汽車及零件恢復加徵25%、5%關稅，特朗普隨即召開白宮會議，晚上香港11時宣佈下令美國公司尋找中國以外供應，美國股市即時開始大跌，杜瓊斯指數收市跌623點（23.7%），收市後特朗普宣佈對2,500億美元中國貨物徵5個百分點關稅，由25%升到30%，10月1日起實施，又對另外3,000億美元中國貨加徵關稅15%（原來話係10%），其中一半自9月1日起，其餘一半自12月15日起實施。

特朗普認為中國唔畀面，夠膽還手，盛怒之下，將貿易關稅戰急速升溫，中國及香港廠商自然大受衝擊，廠家L話美國訂單減少，唯有向歐洲割價求售希望多少補番吓。依家美國入口商落單前首先係問：「有冇中國以外生產基地？」假如答有，在越南嘅話，訂單冇問題，如答冇，生產設施全在中國，咁就冇法子再傾生意。左丁山問佢，何不搬去越南？廠家L話：「似係搬屋咁易咩，即使想遷廠，越南方面已經爆晒，根本唔夠工人開工呀，搬咗去越南嘅老友，依家都未必可如期交到貨，大買家沃爾瑪入貨數量太大，一定要在中國繼續買貨，盡量向我哋行家壓價，壓得太低咪唔做囉，總之係一頭煙，食龍肉都冇心機。」香港正是屋漏兼逢連夜雨，黑天娥罔顧貿易戰形勢搞修例，帶來完美風暴，真係多得佢唔少。

左丁山
電郵 :[email protected]

上一則
上一則
開學欺凌問題 (陶傑)

下一則
下一則
如果林鄭捨得看直播 (林夕)