Whatsgap﹑和你Eat等嘅出現方便大家搵黃店，令黃色經濟圈逐漸成形。不過要得以持久，除咗餐廳，可以由 日常生活 習慣著手，令整個生態持之以恆。

香港人除咗鍾意食，仲鍾意參加唔同活動、興趣班 (攝影/語言/泰拳/急救) 、補習、義教等。單係某建制派組織一季課堂，已經超過三百款。呢啲紅色資本同大集團，成為咗想發展所長嘅黃色導師同小店嘅強大競爭對手。

黃色導師同學生絕對可以建立另一個自給自足嘅經濟圈。不過，黃色經濟圈不等於要求黃絲做義工（詳見巴打說法：https://lih.kg/1758611 ）。將佢融入生活，成立黃色活動圈，除咗可以令學生更容易搵到啱心水嘅黃色導師同課堂，又可以令佢地多個途徑比多啲人認識。支持黃色自家創作同文化推廣同時，比手足多個機會一展所長，對抗紅色資本。

[黃色活動圈概念]

整合一個渠道，發放所有由手足舉行嘅活動、講座、工作坊、常規課堂，甚至社會運動，連結參加者同黃色導師。

．任何人士 只要上網頁，就可以輕易搵到想上嘅堂，即時報名；
．導師 只要係黃，就可遞交活動資訊，我地會透過影響力協助導師宣傳，接觸更多人；
．冇資源但有才能嘅手足 可以聯絡我地，由我地安排場地舉行課堂，開班仲可以作為收入來源作幫補；黃色場地提供者 可以多一個途徑宣傳；
．機構 可以利用黃色活動圈舉辦課堂，避免支持紅色資本，為黃色導師同小店提供營利機會；
．加入社會抗爭日程，大眾清楚知道近期會舉行嘅活動、集會、遊行。

[好處]

1. 擴大黃色經濟圈：想上堂唔洗再幫襯藍舖、紅色資本、大集團，可以幫助零售以外、名氣唔大、想創業嘅黃色導師。

2. 統一發放渠道：目前香港並冇一個齊整嘅黃色導師同課堂資訊，推出黃色活動圈可以方便香港市民接觸黃色小店同導師。所有活動時間、類別、地區、內容一目了然，可以直接報名。

3. 增加宣傳：我地會定期係TG Channel、social media、網頁分享活動，導師能夠藉此增加名氣。

4. 提供資源：手足有一技之長但苦於場地安排、宣傳方法嘅時候，可以透過黃色活動圈將諗法付諸實行。

[目前進度同現有資源]

1. 與部份黃色導師有聯繫：我地已同數10個嘅黃色導師合作過，聯絡左佢地，不少都願意加入。之後亦會繼續周圍搵，只要係黃，就歡迎加入。

2. 相關嘅觀眾群：目前平台有一群有求知慾、有知識追求嘅讀者，黃色活動圈亦與平台教學理念相似 (詳細可以參考我地Social Media)。會透過平台影響力發放資訊，有效接觸到相應市場，將黃色活動圈不斷擴大。

3. 場地提供：曾同5個合作過，當中有2個已確認加入，3個尚待確認。我地亦歡迎更多場地提供者加入黃色活動圈。

4. 現成平台：目前平台已經有報名、資訊發佈嘅功能，我地亦會整合、認證同製作圖片，預計兩星期後可以正式推出。之後亦計劃推出APP，更方便大家使用。

[重點：大家可以點幫手？]

1. 歡迎大家畀意見或積極發問，睇下我地做嘅野係唔係大家心目中想要嘅野
2. 提供黃色導師/講者名單
3. 歡迎有興趣嘅導師報名，我地會有專人聯絡您：https://bit.ly/2Rdv5Tl
4. 提議下黃色導師可以叫咩名（黃導師：好似好老土/黃師：驚同黃絲撈亂）

我地會兩星期後再同大家更新活動、導師、場地數目，仲有平台介面同樣本。

黃色經濟圈要持續並非一日兩日做到嘅事，推行黃色活動圈係希望將係金錢同資源流入同我地價值觀一致嘅自己人身上。希望更多人一齊加入，擴闊黃色活動圈！等以後想學野唔再只係諗起某個會，而手足有一技之長都可以去追夢！