https://hk.lifestyle.appledaily.com/lifestyle/columnist/%E5%B7%A6%E4%B8%81%E5%B1%B1/daily/article/20191130/20816146/

間諜疑雲 - 左丁山



一位年輕朋友平時得閒時間，多數在周末，與同輩到深圳唱K、按摩，至於有冇其他下文，佢唔肯講。幾年前左丁山某晚坐東鐵列車到沙田，過咗九龍塘隧道時，四個約三十歲男子已經講去到羅湖吃飯之後，有邊幾間按摩店平靚正，又打電話到深圳，叫朋友去邊度邊度等候，可知道北上娛樂，在年輕群組之中，平常不過，特別係在勞工階層，香港夜生活太貴吖嘛。

嗰位年輕人對左丁山講，睇到鄭文傑故事，感覺好驚，恐怕發生在自己身上，左丁山問佢：「你喺邊度返工？」佢話：「在貿易公司，準備考政府工。」左丁山於是答佢：「在私人公司打工，冇乜大利用價值，如果係入咗政府打工，或者有少少唔同。鄭文傑以前係英國領事館職員，風險係大啲嘅，佢應該知所避忌。」

左丁山幾十年來鍾意在暑假旅行之時，閱讀驚險奇情間諜小說，英美暢銷流行小說作者，因名利雙收，有資格聘請專人採集小說背景資料，參考公開有關文件，寫定初稿大綱，然後自己加油加糖加鹽，情節當然全屬虛構，但勝在真假難分，曲折離奇，主角經歷之詳細描述，對讀者甚有教育性。睇得多呢，你就會知道在國際政治世界，外交官冠冕堂皇，出入時尚派對雞尾酒會，背後就要面臨複雜威脅及色誘，須嚴防各方間諜又呃又騙。大使館，領事館職員往往係對方入門對象，職員不怕低級，只要佢係使館僱員，就可以想辦法養之幾千日，用在一朝。

通常小伙子血氣方剛，色誘最容易，捉黃腳雞影相，閒過立秋啦。唔敢出去尋歡呀？晚上寧靜時分，突然有靚女敲酒店房間道門，小伙子一開門，靚女立即撲上投懷，後面立時閃出數名大漢影相，問你點辦，簡直百辭莫辯！唔肯就範，咪公開相片加上偽作消息，令小伙子出醜囉！有一本間諜小說講以色列情報局騙取情報嘅方法，就係叫間諜找出「對象」（target）之人性弱點，離不開美女、美男、銀紙、權力、仇怨及對家庭成員之溺愛，搵到之後就想辦法從弱點着手。小說內之以色列間諜要刺探一間維也納私人銀行之伊拉克將軍戶口，苦無入手門徑，於是跟蹤一位負責晚上最遲走，熄燈關門之女經理，發覺此姝個人獨居，生活苦悶得要命，無男女朋友，無家庭，只是晚上在家狂聽歌劇，但極少極少去歌劇院。間諜上報後，上司派另一位對歌劇有研究之美男到維也納故意在街上撞碰女經理，然後道歉話自己趕住去歌劇院，行路怱忙故此撞到人。女經理一聽，眼睛發亮，與美男講起歌劇來，美男間諜咁就找到入手方法……現實世界，並非童話，一講到間諜行為，香港人邊度夠道行呢。

左丁山
電郵 :[email protected]