經過唔少巴打介紹，已經多左好多手足知道咩係VPN。

但係仲有好多人，由其係中年人，都仲未唔知係乜黎，作為IT狗既我想係度試下介紹俾大家聽VPN係幾咁重要。其實我之前開左個post講過，不過爆左5001，所以重開，內容大同小異。休字眼上改左少少，再清晰一啲。

緊急法終於都用左，真正極權時代已經來臨，雖然大家都恥笑緊林鄭係焦土之母，但其實除左蒙面法外，佢係有權做好多野的，例如限制大家網絡自由，包括ban左連登同telegram。

係了解咩係VPN之前，大家要知道平時上網既小小技術流程。

基本上，大家平時上一個網（例如連登），就係首先由你電腦向你用緊網絡供應商（例如有線）發出指示，話你想上連登，個網絡供應商收到指示後就就會轉發出去連登，話你想上佢個網咁樣。

如果用緊急法既話，林鄭有權禁止所有香港既網絡供應商俾我地上連登，即係個網絡供應商唔會處理我地任何想上連登既指示，但用左VPN其實係可以輕鬆繞過呢個問題。

VPN其實係一個中間人，佢係你網絡供應商同你想上既網中間既一個Server。

用返之前上連登個例子，用左VPN之後就係：

你就係首先由你電腦向有線發出指示，話你想連去VPN，之後有線就連去VPN Server，之後個VPN Server先連返上連登。簡單黎講，就係有線根本唔知你上連登。

你仲可以偽裝係唔同國家既人上你想上既網，例如Netflix係唔同地區係睇到唔同既片既，你用VPN就可以睇到一啲你係香港睇唔到既片

你可能會有三個問題：

一， 你俾一個「我想經VPN上連登」既指示俾有線，個個指示本身都講左你想上連登啦，咁有線都可以唔俾你上啦。正既位就係呢度，你裝左VPN之後基本上你所有send去你網絡供應商既數據都係加左密既，佢唔會知你上咩網睇咩同講咩。

二， 咁佢ban埋VPN咪得囉，呢個接近冇可能，因為VPN 通常有成千上萬個server，連大陸政府同netflix都吹唔漲，基本上以香港政府咁濕鳩係冇能力可以做到的。

三， 咁VPN公司出賣我咁點算？一啲出名既VPN公司都係用No-logging Policy，啫係佢地自己都唔會留低你既紀錄，有個別公司直頭有獨立核數師去監察佢係咪真係咁做，另外，好既VPN公司headquarters都係歐美，所以係唔係會理香港政府既。

大家仲有咩唔明我盡答，有人問過我有冇推介，我整左個Google Doc俾大家：

https://docs.google.com/document/d/1LPgDYHLaeMHCjpfkFucInIPq3oVrh-7XuTClJzCaubU/edit