https://hk.lifestyle.appledaily.com/tech/20200211/3Y6CRC2RUYI54USW25R6DGZRUA/

【黑鏡線索】黑天鵝 - 宋漢生




【黑鏡線索】

有人話，武漢肺炎，係中共遇到最大嘅黑天鵝事件。《黑天鵝效應》作者 Nassim Taleb，前幾日就出咗篇學術短文（https://bit.ly/2vXIq9E），評論政府對WARS嘅應對選項。幾個重點：

首先，最高原則，係當有爆煲嘅可能（risk of ruin），就唔應該用傳統嘅cost-benefit analysis。乜嘢係爆煲嘅可能？

假如，有一百個人入賭場，每人總共賭同一定額。當中有人贏，有人輸底褲，如果有一個輸底褲，可以推斷輸底褲嘅機會係百分之一。如果再玩多輪，下一輪嘅一百個人，可以合理預期，又會有一個人會爆煲，其餘九十九人安全。


誤判疫情 提高冚包散可能

假如，同一個賭局，今次係一個人玩一百日。合理預期，係佢會喺其中一鋪會爆，即係話，佢玩完一百日之前，預期百分百已經爆咗煲。例如，賭徒第二十七日輸底褲，就冇第二十八日或之後，第二十八日或之後嘅機會率已經唔關佢事。爆咗煲，冇仇報。

以上例子，係個人爆煲。集體爆煲，就係冚包散（risk of ruin at the systematic and collective level）。如果有啲事情，係會令人類有集體爆煲嘅可能，呢類事情，發生多幾次，總會有一次終於真係冚包散，正如一個人玩一百日嘅例子。萬一人類冚包散咗，咁就講乜都係假。

Taleb然後指出，有幾個原因，會對疫情關鍵因素造成低估嘅誤判：

1. Spreading rate：根據歷史推斷，但係近年嘅人流交通頻繁咗好多，歷史數據滯後。

2. R0：因為有超級傳播人嘅可能，所以要長啲時間先converge to average。

3. 死亡率：因為確診後一段時間先死亡，死亡後一段時間先報告，所以早期數據通常報細數。

4. Asymmetric uncertainty：病毒嘅未知特性，例如係咪會冇病徵傳染，會影響抗疫措施嘅效果，例如量度體溫。而呢啲uncertainty，多數會令疫情更嚴重，而唔係正反機會對稱。

佢總結：政府有三個選擇。第一，等死，冇嘢可以做。

第二，未必有事嘅，跟指引做個別層面嘅措施，隔離吓，追蹤吓囉。問題係，比起SARS，國際人口流動頻繁咗N倍，疫情散播亦隨之強勁N倍。

第三，正確方法，係面對咁多未知，而又用冚包散嘅可能，係果斷推出非常重手嘅措施，去截斷人流同接觸網絡。唔單止係個別層面，而係包括集體層面嘅極端措施，仲要梗係有咁早得咁早。

[orange]Taleb講咁大輪，對象係自己同WARS距離十萬八千里，覺得未燒到埋身嘅西方讀者，順手炳吓啲左膠傳媒學術蛋頭同政客。[/orange][gold]香港呢，求其一個師奶都識得講：頂你淨係識得舔共，晨早叫咗你全面封關啦，食屎特區政府！[/gold]

撰文：宋漢生
fb : sunghsblog