https://hk.lifestyle.appledaily.com/tech/20200317/7LBNJSW2WOVYN6ZRNS7SXURMXU/

【黑鏡線索】遙距嘅最大挑戰 - 宋漢生




【黑鏡線索】

中国肺炎輸出全球，唔少公司，包括Google美國，轉成遙距工作。

大家發現，唔少工作，尤其科網公司，原來可以遙距。朋友問，既然遙距工作嘅配套，一早存在，咁點解啲公司唔一早就轉咗遙距？

正如防疫唔單止係醫學問題，更加係政治問題。遙唔遙距，唔單止係配套問題，更加係管理問題。

自己公司兩年前開始全遙距工作，亦有朋友嘅公司都轉咗遙距，大家第一個遇到嘅難關，同樣都係：點知道同事有冇真係做嘢？抑或變咗行山銀行？

咁又係。本來，同事全部喺晒公司，邊個幾時出現，有冇人遲到早退，好透明，對於同事嘅時間，老闆覺得好in control。


出糧買時間 定係買成果

By default，老闆覺得，出糧係買時間，所以要量度時間，費事蝕底咗。我以前做過一間科網公司，直頭規定同事返工放工要打卡，係真係有張卡插落部機「叮」一聲咁打卡，然後有HR同事，負責每星期手動將每張卡上嘅時間，入落Excel，加起佢，再交畀管理層，等佢鼓勵同事，再喺公司留耐啲。

問題係，出糧係咪買時間？抑或，其實係買成果？

當然，你咁樣問，老闆會答，係成果。但會補加一句：成果唔容易量度喎。

時間作為單位，有好多好處。一，時間有清晰標準，乜嘢係一個鐘，全世界人都好清楚。二，時間有簡單工具量度，係人都有個鐘，仲可以度得懶準咁。三，時間可以用喺任何職位，一個標準，無限重用，無限伸延。

以成果為單位，工夫就好大分別。首先，要搞清楚，其實想每個同事，交出啲乜嘢成果。淨係呢樣，都已經難到足以令管理層卻步。

時間單位有好多好處，但壞處係，時間對於成果，係一個唔可靠嘅proxy。所以，管理人面對嘅選擇係，揀容易量度但歪炮嘅時間，抑或bite the bullet，花時間做好管理，以成果為量度單位？


遙唔遙距 由管理心態定奪

非遙距、時間單位、容易管理，係三位一體，可以畀到in control嘅感覺。如果改變其中一樣，就會感覺好似失咗控。即係話，如果淨係轉成遙距，其他兩項不變，人之常情，老闆個心會好唔踏實。

去到呢一步，有兩個選擇。一係，就彈返轉頭，都係唔好搞遙距，以前咁咪幾好，in control。一係，就索性把心一橫，改埋另外兩項，遙距、成果單位、強化管理，三位一體，都係in control。

瘟疫逼大家轉遙距，只係一時，可以預期，瘟疫過後，絕大部份公司又會返番之前嘅做法。畢竟，遙唔遙距，唔單係配套問題，更加係管理心態問題。

撰文：宋漢生
fb : sunghsblog