https://hk.entertainment.appledaily.com/entertainment/20200319/5VBLNNC3DX2UAZHXF4TK6DW5QM/

【馮仁昭四圍超】再拍《二月廿九》要穿越
張松枝想Yeesa家聰做爹媽


張松枝喺《二月廿九》飾演嘅辰叔引起唔少話題，網民仲大推導演編劇為佢拍外傳。電視圖片

張松枝噚日喺商台接受訪問，提到佢喺啱啱播完嘅ViuTV劇集《二月廿九》飾演「辰叔」一角，演技被網民激讚，仲要求導演編劇為「辰叔」拍外傳，張松枝話冇諗過會有咁大迴響。問到會唔會再拍攝續集？佢話要睇ViuTV決定，至於會唔會覺得個角色應該見好即收？佢話：「如果有我梗係想，希望到時我可以穿越，Yeesa同家聰做我爹哋媽咪，講辰叔返番後生嗰時。」張松枝透露因為疫情，近日工作差唔多全部停晒：「個個都手停口停，我未開口問人借錢已經偷笑。」


吳海昕喺劇中飾演辰叔囡囡Yeesa，同劉俊謙演嘅余家聰之間關係點到即止。《二月廿九》劇照


張松枝一向被指撞樣韓國男神孔劉，噚日佢訪問時就大派韓風「手指心心」。


冇得去大馬拍劇

之前張松枝喺大馬拍劇集《女法醫JD》，劇中飾演法醫嘅佢話：「之前冇我戲份就先返嚟香港宣傳《二月廿九》，我本來下星期要返大馬繼續拍，𠵱家冇啦，拍唔到，睇吓會唔會喺香港搭返個景拍，我戲份冇減少，因為我爭少少未拍啫！」提到馬來西亞政府宣佈全面鎖國至今個月底，同劇演員蔡卓妍同關智斌留低等劇組開返，佢話：「冇聯絡呀，仲敢講咩，唔敢問，我喺度就話問啫！」呢套劇除咗有「港版孔劉」張松枝外，亦有自稱「圓斌」嘅關智斌，張松枝影相嗰陣忍唔住大派心心，笑住話：「好韓風！」

撰文：馮仁昭