https://hk.entertainment.appledaily.com/entertainment/20200328/Z7MSWXSTN6ZSIZQYKPSGI4OTEU/

【娛樂人物】網民封新一代女神
吳海昕：爸爸為我驕傲

吳海昕（Sofiee）今年30歲，2014年參選港姐，在娛樂圈混了六年，憑ViuTV人氣劇集《二月廿九》Yeesa角色熬出頭，更獲網民封為新一代女神。突然被封女神，她自覺仍有進步空間︰「未去到女神境界，女神外貌相由心生，戲中Yeesa角色先係女神，平易近人又有啲蠢鈍，我諗男仔就係鍾意咁簡單嘅女仔。」

撰文：何永寧

攝影︰仇志德

相關新聞：鍾情邪氣阿當載華

吳海昕很多女神小動作都是不經意︰「好似飲嘢我會咬飲管、諗嘢會托下巴，好似每一秒都安撫緊自己、同自己講嘢，我係會自言自語嘅人。試過沖涼口噏噏，嚇到阿媽敲門問我做乜。咁樣可以幫自己抒發情緒，仲試過講講吓喊，嗰次去到NASA科學家發佈會演講，經歷好多嘢，所以喊。我係個好多餘、多無謂幻想嘅女仔，性格好雙魚座，鍾意幻想，但其實我係處女座。」


吳海昕覺得女神外貌相由心生，自覺仍有進步空間。


2014年選港姐雖贏得「民選港姐」稱號，但為吳海昕帶來的演出機會並不多。資料圖片


吳海昕指爸爸有收看《二月廿九》，更提點她要改善的地方。


「入行唔係衝動」

Sofiee很遲才起跑，大學畢業後任空姐，不是為興趣，只為讓父母安心，有份自給自足的職業。她的夢想是當演員，四年空姐生涯未有撲熄那團火，當年選港姐走捷徑入行，贏的只是旅遊大使獎、「民選港姐」稱號及不多的演出機會。

Sofiee記得參選前跟家人說了番話︰「我同屋企人講，𠵱家我有勇氣對住幾百萬人，代表我有呢個決心。」她早在大學時期已客串做模特兒拍廣告，任空姐時又替電影學系的同學仔義務演出，對演戲有憧憬，她說︰「入行唔係衝動，選美後去咗紐約電影學院讀Film Acting，等人睇到我嘅誠意。」她續說︰「課程畀錢就讀得，使咗好多錢，返到香港由零開始，cast咗50次都唔成功。港姐係好沉重嘅包袱，啲人會覺得你係靠樣，有段時間都自我否定，諗『係咪自己唔好？唔夠人靚？』好在有位前輩同我講『今次唔揀你只係角色唔適合你。』」


發脾氣批踭吳海昕有很多小動作，表情多多討人歡喜。


緊張玩飲管


「個樣辨識度低」

最難忘是有次跟電影《無間道》麥兆輝導演試鏡，Sofiee說當時好奇問導演找她的原因：「導演話『冇呀，開電視見到你做嗰套《賤民》，咪搵你上嚟傾吓偈，睇吓新一代演員有乜想法。』呢次經歷令我知道，每個機會都有可能被前輩見到，我更加唔會放棄每一次演出，那怕是1%或者10%嘅機會，都唔會放過。」

面試時Sofiee遇過不少冷言冷語，被指「個樣好普通」，她自嘲︰「可能我個樣辨識度好低。」她說父母一直很支持自己，雖然他們看《二月廿九》不太懂，但每集爸爸都會提點她改善的地方︰「爸爸為我驕傲。」

化妝：Fiona To
髮型：Zap Tang of Essensuals.hk
場地提供︰Parc古道具公園